Toshkent shahrida 2-aprel kuni momaqaldiroq bilan kuchli jala yomg‘ir yog‘di, shamol tezligi kuchaydi, ba’zi joylarda do‘l yog‘ib o‘tdi.
Yomg‘irning davomiyligi 2,5—3 soat bo‘lgan. Shahar tumanlarida yomg‘irning jadalligi: Teleminora hududida — 10 millimetr, Toshkent—Observatoriya meteostansiyasi hududida — 22 millimetr, Toshkent xalqaro aeroporti hududida — 33 millimetrni tashkil etdi. Do‘lning diametri 11 millimetrga yetdi, shamol ba’zi joylarda 18 metr/sekundgacha kuchaygan.
“O‘zgidromet” ma’lumotiga ko‘ra, taqqoslash uchun, 1936-yil 2-aprelda Toshkent—Observatoriya meteostansiyasi hududida 32 millimetr yomg‘ir yoqqan. O‘zbekistonda bahor faslida momaqaldiroq bilan kuchli jala yomg‘irlar yog‘ishi, ba’zida do‘l yog‘ishi holatlari ko‘pincha sodir bo‘lib turadi. Bunday holatlar Toshkentda bahor oylarida tez-tez kuzatiladi.
Toshkent shahrida 2022-yil mart oyi eng nam, me’yor 66 millimetr bo‘lganda bir oyda 189 millimetr yog‘ingarchilik bo‘lgan, u me’yordan 285 foizni tashkil etadi. Bunday yog‘ingarchilik miqdori 1969-yil rekordini yangiladi, ushbu davrda bir oy davomida 184 millimetr yog‘ingarchilik bo‘lgan.
Mart oyida kecha-kunduzlik maksimal yog‘ingarchilik rekordi 50 millimetrni tashkil etadi, u 2009-yil 18-martda o‘rnatilgan. 2011-yil 14-mart kuni Toshkentda bir kecha-kunduzda 37 millimetr yomg‘ir va qor ko‘rinishidagi yog‘ingarchilik yog‘di. Toshkentda deyarli har yili 15 millimetrdan 22 millimetrgacha bo‘lgan kuchli yog‘ingarchilik bo‘ladi, miqdori 23 mm dan 30 millimetrgacha bo‘lgan jadal yog‘ingarchiliklar esa 3—5 yilda 1-marta kuzatiladi.
Kuzatuv tarixida 1990-yilning aprel oyi eng nam bo‘lgan. Toshkentda 179 millimetr yog‘ingarchilik yog‘di, bu taxminan 3 oylik me’yorni tashkil etdi, 1990-yil 8-aprelda kecha-kunduzlik yog‘ingarchilik miqdorining mutlaq rekordi o‘rnatildi. Aprel oyining oylik me’yori 63 millimetr bo‘lganda shu kun davomida Toshkentda 65 millimetr yomg‘ir yog‘gan.
2019-yil aprel oyida Toshkentda oy davomida 146 millimetr yomg‘ir yog‘di, bu me’yordan 236 foizni tashkil etdi, 24-aprel kuni esa kecha-kunduzlik maksimum 41 millimetrni, bu oylik me’yordan 65 foizni tashkil etdi. 19—21-aprel kunlari ketma-ket uch kun davomida jami miqdori 52 millimetr (oylik normadan 83 foiz) bo‘lgan kuchli yomg‘ir kuzatildi.
Izoh (0)