Samarqandda bankomatni o‘marmoqchi bo‘lgan uch kishi qo‘lga olindi. Bu haqda viloyat IIB matbuot xizmati xabar qildi.
31-mart kuni tungi soat 03:00 lar atrofida uch nafar nomaʼlum shaxs yuzlarini tibbiy niqob bilan berkitgan holda davlat raqam belgisi bo‘lmagan qora Chevrolet Tracker mashinasida Samarqand shahar Buyuk Ipak yo‘li ko‘chasi 65-uyning oldida o‘rnatilgan Aksionerlik tijorat “Turonbank” Samarqand viloyat filialiga tegishli bo‘lgan bankomatni o‘marmoqchi bo‘lgan.
Fuqarolar plastik kartalaridagi pullarini naqd qilib berish uchun xizmat ko‘rsatuvchi ushbu bankomat shoxobchasiga kelib, bankomatni elektr quvvatidan uzgan va buzish yo‘li bilan bankomat ichida bo‘lgan 323 million 290 ming so‘m naqd pullarni yashirin ravishda talon-toroj qilmoqchi bo‘lgan.
Shu vaqtda bankomatning tarmoqdan uzilgani haqidagi signali ishga tushib ketgan. Natijada Samarqand shahar Qo‘riqlash bo‘limiga berilgan ogohlantiruvchi chaqiruv asosida xodimlar voqea joyiga yetib kelgan.
Xizmat mashinasining ogohlantiruvchi tovushlarini eshitgan ushbu fuqarolar o‘g‘irlik jinoyatini oxiriga yetkaza olmasdan, hodisa joyidan yashiringan.
Samarqand shahri bo‘yicha IIO FMB xodimlarining tezkor qidiruv-surishtiruv ishlari natijasida ularning uchalasi ham qo‘lga olingan.
Holat yuzasidan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish) 169-moddasi 4-qismi (bir guruh shaxslar tomonidan oldindan til biriktirib o‘g‘rilik sodir etish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)