Rossiya Ichki ishlar vazirligi mamlakatda yashovchi “til reytingi” past bo‘lgan muhojirlarga jarimalar joriy etishni taklif qilmoqda, deb xabar beradi “Kommersant”.
Qayd etilishicha, jarima miqdori mamlakatga kelgan muhojirlarning rus tilini bilishiga bog‘liq bo‘ladi. Bundan tashqari, IIV rus tilini yaxshi bilgan muhojirlarga soliq imtiyozlarini berish taklifini ham ilgari surmoqda.
“Til reytingini joriy etishning samarali ta’siri moslashish davridan, masalan, identifikatsiya kartasini olgandan keyingi 1-3 oyda boshlanishi kerak. Reyting past bo‘lgan taqdirda — rag‘bat — moslashish to‘lovi”, — deydi Rossiya IIV Migratsiya masalalari bo‘yicha bosh boshqarmasi boshlig‘i Valentina Kazakova.
Kazakovaning aniqlik kiritishicha, idora fuqaroning tilni o‘rganishini baholash bo‘yicha balli tizim — “til reytingi”ni joriy etishni taklif etmoqda. U chet el fuqarosi haqidagi faktik ma’lumotlarni baholash algoritmi asosida hisoblab chiqiladi. Shundan so‘ng muhojirlar rus tilini bilish darajasiga ko‘ra bir necha toifalarga bo‘linadi.
IIV mas’uliga ko‘ra, rus tilini yaxshi bilgan muhojirga daromad solig‘i bo‘yicha imtiyoz taqdim etish mumkin bo‘ladi. Vazirlikka ko‘ra, bunday chegirmali imtiyoz 50 foizga yetadi.
Bunda chegirma miqdori farqlangan xarakterga ega bo‘ladi. Rus tilini bazaviy bilganlarga 10 foiz, o‘rta darajaga — 15 foiz, yuqori daraja — 20 foiz, rus tili tashuvchisi bo‘lgan muhojirlarga esa 50 foizli soliq chegirmasi beriladi.
Mart o‘rtalarida Rossiya firmalari Markaziy Osiyodan kelgan yuzlab muhojirlarni bosib olingan Ukraina hududlariga ishlash uchun yollagani ma’lum bo‘lgandi. Muhojirlar rus askarlarining jasadlarini yig‘ish, xandaqlar qazish va jangovar harakatlar natijasida vayron bo‘lgan binolarni ta’mirlash bilan shug‘ullanishi aytilgan edi.
Izoh (0)