Moldova prezidenti Mayya Sandu bundan buyon barcha qonun hujjatlarida davlat tilini moldovan emas, rumin tili deb atash to‘g‘risidagi qonunni imzoladi. Bu haqda Sanduning Facebook’dagi sahifasida xabar berildi.
“Rumin tili bu yerda yashovchi va shu zaminni sevadigan barchani birlashtirishini istayman. Dunyo bo‘ylab 27 milliondan ortiq odam bilan birgalikda biz ham Yevropa Ittifoqining rasmiy tillaridan biri bo‘lgan rumin tilida gaplashamiz”, — dedi Sandu.
Moldova prezidenti, shuningdek, mamlakat aholisi rumin tilida emas, moldovan tilida gaplashadi, deganlarning “maqsadi bitta — bizni ajratish” degan fikrni bildirdi.
Moldova parlamenti 16-mart kuni moldovan tilini rumin tiliga o‘zgartirish to‘g‘risidagi qonunni qabul qildi. Prezidentning “Harakat va birdamlik” partiyasi deputatlari qonunni yoqlab chiqdi, kommunistlar va sotsialistlar fraksiyasi esa bunga qarshi chiqdi.
Qonun Moldova Konstitutsiyaviy sudining 2013-yilda konstitutsiyadagi “moldovan tili” tushunchasini “rumin tili” bilan almashtirish haqida chiqargan qarorini bajarish maqsadida qabul qilingan.
Moldovan va rumin tillari roman tillarining Bolqon-roman kichik guruhiga kiradi va ular o‘zaro bog‘liq. Ba’zi tilshunoslar “moldovan” va “rumin” tillarini bir tilning turli nomlari deb hisoblasa, boshqa qismi moldovan tilini mustaqil Sharqiy roman tili deb ataydi.