Janglarning shiddatli borishi sabab Ukraina armiyasi har kuni 4 000 tadan 7 000 tagacha artilleriya o‘qlarini sarflashga majbur bo‘lmoqda. Bu haqda NATO bosh kotibi Yens Stoltenberg ma’lum qildi, deb yozadi The Guardian.
Shu bilan birga, NATO rahbari Rossiya tomoni sutkasiga bundan ham ko‘proq snaryadlardan foydalanayotganini ta’kidladi.
“Urush shu qadar shiddatli kechmoqdaki, Ukraina kuniga 4 000 dan 7 000 tagacha, Rossiya Federatsiyasi esa 20 000 tagacha artilleriya snaryadlarini ishlatmoqda. Hozir o‘q-dori iste’moli darajasi ishlab chiqarish darajasidan yuqori”, — dedi Stoltenberg.
Uning ta’kidlashicha, Ukraina uchun o‘q-dorilar masalasi dolzarbligicha qolmoqda, chunki Putin urushni tugatish niyatida emas.
“G‘arb Ukrainani o‘q-dori va qurollar bilan davomli qo‘llab-quvvatlashga tayyorlanishi kerak”, — dedi NATO bosh kotibi.
Uning so‘zlariga ko‘ra, Rossiya harbiy-sanoat ishlab chiqarishni ko‘paytirmoqda, shuningdek, qurol-yarog‘ uchun Eron, Shimoliy Koreya va boshqa davlatlarga murojaat qilmoqda.
Shundan kelib chiqib, alyans rahbari NATO aʼzolarini mudofaa xarajatlarini oshirishga chaqirdi.
Izoh (0)