Xitoyda sun’iy intellekt asosida virtual teleboshlovchi yaratildi (video)

Xitoyning People’s Daily davlat nashrida sun’iy intellekt yordamida yaratilgan yangi teleboshlovchi faoliyat yuritishni boshladi. Unga Ren Xiaorong nomi berildi. Bu haqda Daily Mail xabar berdi.

Texnologiya “minglab boshlovchilar”ning professional mahoratiga ega va istalgan mavzuda erkin gapira oladi. Virtual qiz yil bo‘yi istalgan mavzudagi yangiliklarni efirga uzata olishi aytilmoqda.

“Men 365 kun, 24 soat butun yil davomida, kechayu kunduz, dam olmasdan yangiliklarni uzatib boraman”, — deydi Ren.

Boshlovchi faqat oldindan berilgan savollarga javob bera oladi. Uning javoblari Xitoy Kommunistik partiyasi markaziy qo‘mitasi tomonidan o‘z g‘oyalarini ilgari surish uchun ishlatiladi. Tomoshabinlar sun’iy intellektni propagandada ayblamoqda.

Bir tomoshabin Ren ilg‘or texnologiyalar, soliq imtiyozlari, to‘lovlar, Xitoyning “Ikki sessiya” siyosiy konferensiyasini muhokama qilishi mumkinligini aytdi. Biroq boshlovchi javobi odamlar tomonidan oldindan yozilgan va hukumat tashviqotini o‘z ichiga oladi. Sun’iy intellekt yordamida yaratilgan boshlovchi birinchi marta Weibo striming-platformasidagi videolavhada namoyish etilgan. 2018-yilda Sinxua davlat axborot agentligi birinchi sun’iy intellektli boshlovchini taqdim etgan.