Namanganda Navro‘z bayramining asosiy tadbirlari viloyat markazidagi Bobur nomli va “Afsonalar vodiysi” istirohat bog‘larida bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Bobur nomli bog‘da erta tongdan karnay-surnay sadolari yangradi. Mehmonlarga turfa xil bahoriy taomlar tortiq qilindi. Xalq hunarmandchiligi namunalari, qo‘l mehnati bilan tayyorlangan mahsulotlar namoyish etildi.
“Afsonalar vodiysi” bog‘i esa milliy ko‘rinishda bezatildi, o‘tovlargacha o‘rnatildi, mezbonlarning aksariyati ham milliy liboslarda edi. Polvonlar va dorbozlarning chiqishlari kuzatildi, varraklar uchirildi, doshqozondagi sumalak va palov, ko‘k somsa va chuchvaraning hidi ishtahani qitiqladi. Xatna to‘ylari o‘tkazilayotgan bolalarga sovg‘alar taqdim etildi.
.jpg)
Mazkur boqqa kelgan barchaning eʼtibori mahalliy rekordlar kitobiga daʼvogarlik qilayotgan mega lavashda bo‘ldi. Uzunligi 80 metr bo‘lgan ushbu taomni tayyorlash uchun 80 kilogramm go‘shtdan foydalanilgani aytilmoqda. Yana 40 kilogramm pomidor va bodring, 15 kilogramm qovurilgan kartoshka, 20 litr sous va boshqa mahsulotlar ishlatildi.
100 dan ortiq oshpaz mehnati evaziga tayyorlangan mega lavash Yangi Namangan tumanidan sayl mehmonlariga bayram tuhfasi bo‘ldi.
Navro‘z tadbirlarini “Afsonalar vodiysi” bog‘i amfiteatridagi katta bayram konserti yakunlab berdi. Konsert mehmonlari orasida xorijliklar ham ko‘p edi. Ular Otabek Muhammadzohid, Gulsanam Mamazoitova, Yahyobek Mo‘minov va boshqa xonandalarning chiqishlariga hamma qatori mazza qilib raqsga tushdi.
.jpg)
Jozibali taronalardan biriga raqsga tushish uchun viloyat hokimi Shavkat Abdurazzaqov ham taklif etildi. Gulsanam Mamazoitova esa bayram tadbirini chetda turib kuzatayotgan nogironligi bo‘lgan ayol oldiga borib, uni bag‘riga bosdi va ayyom bilan qutladi.
Izoh (0)