Наманганда Наврўз байрамининг асосий тадбирлари вилоят марказидаги Бобур номли ва “Афсоналар водийси” истироҳат боғларида бўлиб ўтди. Бу ҳақда “Дарё” мухбири Азизбек Абдувалиев хабар бермоқда.
Бобур номли боғда эрта тонгдан карнай-сурнай садолари янгради. Меҳмонларга турфа хил баҳорий таомлар тортиқ қилинди. Халқ ҳунармандчилиги намуналари, қўл меҳнати билан тайёрланган маҳсулотлар намойиш этилди.
“Афсоналар водийси” боғи эса миллий кўринишда безатилди, ўтовларгача ўрнатилди, мезбонларнинг аксарияти ҳам миллий либосларда эди. Полвонлар ва дорбозларнинг чиқишлари кузатилди, варраклар учирилди, дошқозондаги сумалак ва палов, кўк сомса ва чучваранинг ҳиди иштаҳани қитиқлади. Хатна тўйлари ўтказилаётган болаларга совғалар тақдим этилди.
.jpg)
Мазкур боққа келган барчанинг эътибори маҳаллий рекордлар китобига даъвогарлик қилаётган мега лавашда бўлди. Узунлиги 80 метр бўлган ушбу таомни тайёрлаш учун 80 килограмм гўштдан фойдаланилгани айтилмоқда. Яна 40 килограмм помидор ва бодринг, 15 килограмм қовурилган картошка, 20 литр соус ва бошқа маҳсулотлар ишлатилди.
100 дан ортиқ ошпаз меҳнати эвазига тайёрланган мега лаваш Янги Наманган туманидан сайл меҳмонларига байрам туҳфаси бўлди.
Наврўз тадбирларини “Афсоналар водийси” боғи амфитеатридаги катта байрам концерти якунлаб берди. Концерт меҳмонлари орасида хорижликлар ҳам кўп эди. Улар Отабек Муҳаммадзоҳид, Гулсанам Мамазоитова, Яҳёбек Мўминов ва бошқа хонандаларнинг чиқишларига ҳамма қатори мазза қилиб рақсга тушди.
.jpg)
Жозибали тароналардан бирига рақсга тушиш учун вилоят ҳокими Шавкат Абдураззақов ҳам таклиф этилди. Гулсанам Мамазоитова эса байрам тадбирини четда туриб кузатаётган ногиронлиги бўлган аёл олдига бориб, уни бағрига босди ва айём билан қутлади.
Изоҳ (0)