“Tramp tarafdorlariga murojaat qilib, meni qo‘llab-quvvatlang, norozilik bildiring, deya undamoqda” — Navbahor Imomova

“Amerika ovozi” jurnalisti AQSH sobiq prezidenti Donald Tramp atrofidagi mashmashani sharhladi. Suhbatni “Daryo” jurnalisti uyushtirdi.

Uning ta’kidlashicha, Qo‘shma Shtatlarni 2017—2021-yillar orasida boshqargan Donald Tramp 2016-yilgi prezident saylov kompaniyasida o‘zining qator qing‘ir ishlarini yopish uchun ayrim shaxslarga katta miqdorda pora bergan degan gumon tekshirilmoqda.

“Shu tekshiruv asosida yig‘ilgan isbot-dalillar Oliy hay’at diqqatida. Oliy hay’at bu Nyu-York shtatida 23 kishidan iborat maxsus guruh bo‘lib, holatga obyektiv baho beruvchi oddiy fuqarolardan tashkil topgan. Ularning aksari, ya’ni 12 nafari dalillar yetarli deb ovoz bersa, sud buyrug‘i bilan Tramp hibsga olinishi mumkin. Aks holda, ya’ni hay’at dalillar yetmaydi desa, bu ish sudga oshirilmaydi.

Hozirgi ish federal tergov hisoblanmaydi, bu faqat Nyu-York shahriga tegishli ish. Unga ko‘ra, Tramp o‘z ishqiy munosabatda ikki ayolga munosbatlari haqida og‘iz ochmasligi uchun advokatlar orqali millionlab dollar bergani taxmin qilinmoqda. Tramp bu gumonlarni inkor etib keladi, ularni asossiz deb hisoblaydi. Bu ayollar bilan hech qanday munosabatda bo‘lmaganman deb keladi.

So‘nggi kunlarda Tramp tarafdorlariga murojaat qilib, meni qo‘llab-quvvatlab chiqing, namoyishlar uyushtiring demoqda. Aks holda, demokratlar, liberallar fitnalar bilan chiqib, meni 2024-yilgi saylov kompaniyasidan uzoqlashtirmoqchi. Ular prezident bo‘lishimni xohlashmaydi, demoqda. Shundan so‘ng bu namoyishlarning boshlanish xavfi baholanib, turli choralar ko‘rish boshlangan.

Donald Tramp yuristlarining aytishicha, unga nisbatan sud hukmi chiqadigan bo‘lsa, o‘zi ongli ravishda polisiya huzuriga boradi. Undan barmoq izlari olinadi, suratga tushiriladi, so‘roq qilinadi. Yuristlar sobiq prezident tovon evaziga qo‘yib yuborilishidan umid qilmoqda. Tramp tarafdorlari, oilasi va uning o‘zi ham qorong‘u kamerada, qo‘liga kishan taqilgan holda o‘tirganini tasavvur qilmayapti. 

Tramp qilmishlari uchun javob berishi kerak degan talab jamiyatda kuchlilik qilmoqda. Lekin qonun ustuvorligi ta’minlanishi kerak. Nyu-York prokuraturasi Trampning huquqlari albatta himoya qilinishini aytmoqda. Shu bilan birga, sudning buyrug‘i ham bajariladi. Lekin bundan avval uni jinoyatda gumon qilish uchun yetarlicha isbot-dalil bo‘lishi kerak. Hozircha bu qarorga kelingani yo‘q”, — deb ta’kidladi jurnalist.