Andijondagi qurilish obyektlarida loyihalarda ko‘zda tutilgan talablar bajarilmayotgani aniqlandi

Qurilish va uy-joy kommunal xo‘jaligi vazirligi tomonidan Andijon viloyatidagi qurilish obyektlarida o‘tkazilgan o‘rganishlar davomida quruvchilar loyihalarda ko‘zda tutilgan talablarga rioya qilmayotgani aniqlandi. Bu haqda “Daryo” muxbiri xabar bermoqda.

Maʼlum bo‘lishicha, Qurilish va uy-joy kommunal xo‘jaligi vazirligi masʼullari, qator qurilish-loyiha tashkilotlari mutaxassislari hamda ommaviy axborot vositalari vakillaridan iborat tezkor guruh Andijon shahridagi qurilish obyektlarida o‘rganishlar olib borgan. O‘rganishlar davomida bir qator kamchilik va qonun buzilish holatlari aniqlangan.

Jumladan, Andijon shahar Fitrat ko‘chasida joylashgan uch gektar yer maydonida bunyod etilayotgan 1135 xonadondan iborat 9 qavatli turar joy binosida loyiha talablari bajarilmagani aniqlangan. Bundan tashqari, obyektda texnika xavfsizligi qoidalariga rioya etilmagani, ishchilarda muhofaza uchun maxsus kiyimlar yo‘qligi yaqqol ko‘zga tashlangan.

“Qishloq qurilish loyiha” loyiha-qidiruv instituti bosh konstruktori Sherzod Odilovning aytishicha, loyihada seysmik taʼsirlar bo‘yicha ko‘rsatilgan talablar bajarilmagan. Fasad bo‘yicha binoning qavatlari oralig‘ida to‘ldiruvchilarda har xil kuchaytiruvchi tadbirlar qo‘llangan. Masalan, birinchi qavatdan beshinchi qavatgacha metall “ugolok” ishlatilgan bo‘lsa, keyingi qavatlarning baʼzi joylarida temir-beton o‘zaklardan foydalanilgan.

“Ushbu obyekt 9 qavatli, tepa qismi mansarda qavati, birinchi qavatida noturar joy joy sifatida loyihalashtirilgan bo‘lib, bugungi kunda qurilish-montaj ishlari davom etyapti. O‘rganish jarayonida bir qator kamchiliklar aniqlandi. Loyihalashda obyektning qaysi hududning mikroseysmik tumanlashtirish xaritasiga binoan Andijon shahar mikroseysmik xaritasi, yaʼni 9 balli hududga kirishi maʼlum. Afsuski, loyihada qaysi balli qismida qanday balli sistemaga hisoblangani ko‘rsatib o‘tilmagan. Bundan tashqari, loyihada binoning to‘ldiruvchilari 250 qalinlikdagi pishiq g‘ishtdan to‘ldirilishi ko‘rsatilgan bo‘lsa-da, uning atrofida seysmik yuklarni qabul qilmaydigan to‘ldiruvchilar qilingan. Shuningdek 20-30 millimetr qalinlikdagi temir beton elementlar, yaʼni asosiy yuk ko‘taruvchi rigl kalonalar oralig‘idagi 30 millimetr qalinlikdagi choklar qoldirilishi, ushbu choklar qurilish penasi orqali to‘ldirilishi ko‘zda tutilgan. Amalda loyihadagi bu ko‘rsatkichlar bajarilmagan. Bundan tashqari, vertikal va gorizontal o‘rnatiluvchi elementlar qoldirilmagan, energiya samaradorligi talablari ham bajarilmagan.

Kamchiliklarni bartaraf etish yuzasidan qurilish pudrat tashkiloti ish yurituvchilariga tegishli ko‘rsatmalar berildi hamda shu bo‘yicha ishlarni tashkillashtirish tushuntirildi. Kamchiliklarni to‘g‘rilash bu qurilish pudrat tashkilotining o‘z salohiyatiga bog‘liq. Bu bir-ikki kunlik ish bo‘lmaydi. Kamchiliklarni tuzatgunga qadar qurilish-montaj ishlarini to‘xtatib turish talab qilinadi”, — deydi Sherzod Odilov.