Андижондаги қурилиш объектларида лойиҳаларда кўзда тутилган талаблар бажарилмаётгани аниқланди

Қурилиш ва уй-жой коммунал хўжалиги вазирлиги томонидан Андижон вилоятидаги қурилиш объектларида ўтказилган ўрганишлар давомида қурувчилар лойиҳаларда кўзда тутилган талабларга риоя қилмаётгани аниқланди. Бу ҳақда “Дарё” мухбири хабар бермоқда.

Маълум бўлишича, Қурилиш ва уй-жой коммунал хўжалиги вазирлиги масъуллари, қатор қурилиш-лойиҳа ташкилотлари мутахассислари ҳамда оммавий ахборот воситалари вакилларидан иборат тезкор гуруҳ Андижон шаҳридаги қурилиш объектларида ўрганишлар олиб борган. Ўрганишлар давомида бир қатор камчилик ва қонун бузилиш ҳолатлари аниқланган.

Жумладан, Андижон шаҳар Фитрат кўчасида жойлашган уч гектар ер майдонида бунёд этилаётган 1135 хонадондан иборат 9 қаватли турар жой биносида лойиҳа талаблари бажарилмагани аниқланган. Бундан ташқари, объектда техника хавфсизлиги қоидаларига риоя этилмагани, ишчиларда муҳофаза учун махсус кийимлар йўқлиги яққол кўзга ташланган.

“Қишлоқ қурилиш лойиҳа” лойиҳа-қидирув институти бош конструктори Шерзод Одиловнинг айтишича, лойиҳада сейсмик таъсирлар бўйича кўрсатилган талаблар бажарилмаган. Фасад бўйича бинонинг қаватлари оралиғида тўлдирувчиларда ҳар хил кучайтирувчи тадбирлар қўлланган. Масалан, биринчи қаватдан бешинчи қаватгача металл “уголок” ишлатилган бўлса, кейинги қаватларнинг баъзи жойларида темир-бетон ўзаклардан фойдаланилган.

“Ушбу объект 9 қаватли, тепа қисми мансарда қавати, биринчи қаватида нотурар жой жой сифатида лойиҳалаштирилган бўлиб, бугунги кунда қурилиш-монтаж ишлари давом этяпти. Ўрганиш жараёнида бир қатор камчиликлар аниқланди. Лойиҳалашда объектнинг қайси ҳудуднинг микросейсмик туманлаштириш харитасига биноан Андижон шаҳар микросейсмик харитаси, яъни 9 балли ҳудудга кириши маълум. Афсуски, лойиҳада қайси балли қисмида қандай балли системага ҳисоблангани кўрсатиб ўтилмаган. Бундан ташқари, лойиҳада бинонинг тўлдирувчилари 250 қалинликдаги пишиқ ғиштдан тўлдирилиши кўрсатилган бўлса-да, унинг атрофида сейсмик юкларни қабул қилмайдиган тўлдирувчилар қилинган. Шунингдек 20-30 миллиметр қалинликдаги темир бетон элементлар, яъни асосий юк кўтарувчи ригл калоналар оралиғидаги 30 миллиметр қалинликдаги чоклар қолдирилиши, ушбу чоклар қурилиш пенаси орқали тўлдирилиши кўзда тутилган. Амалда лойиҳадаги бу кўрсаткичлар бажарилмаган. Бундан ташқари, вертикал ва горизонтал ўрнатилувчи элементлар қолдирилмаган, энергия самарадорлиги талаблари ҳам бажарилмаган.

Камчиликларни бартараф этиш юзасидан қурилиш пудрат ташкилоти иш юритувчиларига тегишли кўрсатмалар берилди ҳамда шу бўйича ишларни ташкиллаштириш тушунтирилди. Камчиликларни тўғрилаш бу қурилиш пудрат ташкилотининг ўз салоҳиятига боғлиқ. Бу бир-икки кунлик иш бўлмайди. Камчиликларни тузатгунга қадар қурилиш-монтаж ишларини тўхтатиб туриш талаб қилинади”, — дейди Шерзод Одилов.