Farg‘onada yoshlar tashabbusi bilan “Konstitutsiya o‘zimizniki” shiori ostida targ‘ibot tadbiri va konsert-shou o‘tkazildi

Farg‘ona shahrida viloyat yoshlari tashabbusi bilan “Konstitutsiya meniki, seniki, bizniki! Konstitutsiya o‘zimizniki” shiori ostida Konstitutsiyaviy qonun loyihasi bo‘yicha targ‘ibot tadbiri va konsert-shou dasturi bo‘lib o‘tdi. Bu haqda “Daryo” muxbiri xabar berdi.

Tadbirda oliy taʼlim muassasalari talabalari, viloyatning shahar va tumanlarida yashovchi 2,5 ming nafardan ziyod yoshlar ishtirok etdi. Albatta, tashabbus yoshlarniki bo‘ldi, lekin bu davraning mohiyatini yana-da chuqurroq anglagan turli yoshdagi farg‘onaliklar ham o‘zlarini chetga tortishmadi.

Bundan tashqari, tadbirda Farg‘ona viloyatidagi chet tillarni o‘qitishga ixtisoslashtirilgan davlat umumtaʼlim maktab-internati direktori Eleonara Dadajonova, Murad Buildings kompaniyasi asoschisi Murod Nazarov, taniqli sport ustalari qatnashdi.

Tadbir davomida Konstitutsiyaga kiritilayotgan yangiliklar to‘g‘risida, shuningdek, referendum o‘tkazish tartibi, unda ishtirok etish bo‘yicha yoshlar tashabbuslari, takliflari ilgari surildi.

“Yaqingacha kasbimning nomini aytgani xijolat bo‘lardim, jamiyatda o‘qituvchi eng keraksiz aʼzosidek bo‘lib qolgandi, — deydi Farg‘ona viloyatidagi chet tillarga ixtisoslashtirilgan davlat umumtaʼlim maktab-internati direktori Eleonara Dadajonova.

— O‘qituvchining obro‘si tushgan, himoyasiz edi. Unga esa hamma “xo‘jayin”! Hali qarasang, hokimiyat ko‘cha supurishga chiqargan, hali qarasang mahalla ‘svet’ga yoki gazga pul to‘lamaganlarni ro‘yxatga oldirgan, hatto axlatga pul undirish uchun ham o‘qituvchini yuborishardi. Ruscha ‘snos’ so‘zini bilmaydigan o‘qituvchi qolmadi.

O‘qituvchilarning paxta yetishtirish va yig‘im-terim ishlarida ishtirok etishi haqida umuman gapirmasam ham bo‘lar edi. Xudoga shukur, endi bularni barchasini yomon tushdek eslaymiz.

Afsuski, bu ishlar faqat o‘qituvchilarning o‘zinigina kamsitmadi. Mana shu himoyasiz o‘qituvchi, maktabga kelganidan keyin ham o‘quvchilarga dars berishdan boshqa hamma ishni qilgan bechora o‘qituvchi tufayli bir necha avlodning taʼlim-tarbiyasi izdan chiqdi.

Endi Konstitutsiyamizning 52-moddasida davlat ham, jamiyat ham o‘qituvchilarning shaʼni, qadr-qimmatini himoya qilishi, ularga g‘amxo‘rlik ko‘rsatishi zarurligi o‘z aksini topadi. Yaʼni o‘qituvchining mehnati jamiyatimiz va davlatimizni taraqqiy toptirishning asosiy omili ekanligi tan olinyapti.

Bundan buyon hech qaysi mansabdor o‘qituvchilarni kamsita olmaydi. O‘qituvchi endi o‘qitadi, ilm beradi, orzularga qanot, maqsadlarga qatʼiyat bag‘ishlaydi”.