O‘zbekistonda 18-martdan “Tashabbusli budjet” loyihasining birinchi mavsumi doirasida ovoz berish jarayoni boshlandi. Bu haqda Iqtisodiyot va moliya vazirligi Jamoatchiliki bilan aloqalar boshqarmasi xabar berdi.
Ushbu mavsum doirasida aynan fuqarolar tomonidan ilgari suriladigan loyihalarni moliyalashtirish maqsadida respublika bo‘ylab qariyb 1,7 trillion so‘m mablag‘ yo‘naltirilishi kutilmoqda.
“Hurmatli fuqaro! Ushbu jarayonlarda faol ishtirok etgan holda ijtimoiy muammolarni (jamoaviy xarakterdagi) hal etilishiga erishing. Budjet mablag‘lari sarflanishida ishtirok eting. Bu juda ham oson, o‘z hududingizdagi mavjud muammolarni bartaraf etish yuzasidan loyihani ilgari suring, ovoz to‘plang va g‘olib bo‘ling”, — deyiladi xabarda.
Avvalroq 2023-yilgi tuman va shahar budjetlarida tashabbusli budjet jarayonlari uchun jami 2 trillion so‘m mablag‘ yo‘naltirish ko‘zda tutilgani, shundan 1 trillion so‘mi birinchi mavsumda ajratilishi to‘g‘risida xabar berilgandi. 2023-yil boshida mahalliy budjetlarda shakllangan erkin qoldiq mablag‘larining 30 foizi mahalliy hokimliklar tomonidan Fuqarolar tashabbusi jamg‘armasiga yo‘naltiriladi.
Dastlabki hisob kitoblarga ko‘ra, birinchi mavsum uchun Fuqarolar tashabbusi jamg‘armalarida jami 1,7 trillion so‘m mablag‘ shakllanishi ko‘zda tutilmoqda.
Izoh (0)