Ўзбекистонда 18 мартдан “Ташаббусли бюджет” лойиҳасининг биринчи мавсуми доирасида овоз бериш жараёни бошланди. Бу ҳақда Иқтисодиёт ва молия вазирлиги Жамоатчилики билан алоқалар бошқармаси хабар берди.
Ушбу мавсум доирасида айнан фуқаролар томонидан илгари суриладиган лойиҳаларни молиялаштириш мақсадида республика бўйлаб қарийб 1,7 триллион сўм маблағ йўналтирилиши кутилмоқда.
“Ҳурматли фуқаро! Ушбу жараёнларда фаол иштирок этган ҳолда ижтимоий муаммоларни (жамоавий характердаги) ҳал этилишига эришинг. Бюджет маблағлари сарфланишида иштирок этинг. Бу жуда ҳам осон, ўз ҳудудингиздаги мавжуд муаммоларни бартараф этиш юзасидан лойиҳани илгари суринг, овоз тўпланг ва ғолиб бўлинг”, — дейилади хабарда.
Аввалроқ 2023 йилги туман ва шаҳар бюджетларида ташаббусли бюджет жараёнлари учун жами 2 триллион сўм маблағ йўналтириш кўзда тутилгани, шундан 1 триллион сўми биринчи мавсумда ажратилиши тўғрисида хабар берилганди. 2023 йил бошида маҳаллий бюджетларда шаклланган эркин қолдиқ маблағларининг 30 фоизи маҳаллий ҳокимликлар томонидан Фуқаролар ташаббуси жамғармасига йўналтирилади.
Дастлабки ҳисоб китобларга кўра, биринчи мавсум учун Фуқаролар ташаббуси жамғармаларида жами 1,7 триллион сўм маблағ шаклланиши кўзда тутилмоқда.
Изоҳ (0)