Sirdaryo viloyatida o‘zi avval ishlagan korxonadagi somon g‘aramiga qasddan o‘t qo‘ygan fuqaroga hukm o‘qildi. Bu haqda “Zamon” informatsion dasturida ma’lum qilindi.
Qayd etilishicha, jinoyat ishlari bo‘yicha Sardoba tuman sudi 52 yoshli elektr montyori tomonidan sodir etilgan ishni ko‘rib chiqdi.
Aniqlanishicha, sudlanuvchi Sardoba tumanidagi MCHJning hindistonlik rahbari bilan ish yuzasidan tortishib qolgan, o‘z navbatida rahbar uni qayta ishxonaga kiritmaslik bo‘yicha qorovullarga ko‘rsatma bergan.
Ertasi kuni ishxonaga kelganida binoga kiritilmagan erkak shu hududdagi somon g‘aramiga o‘t qo‘yib, g‘aram katta olovga aylangach, qochib ketgan.
Sudya Zafarjon Rasulovning aytishicha, bu vaqtda ishchi mast bo‘lgan. U korxona rahbariyatiga qo‘ng‘iroq qilib, noqonuniy ravishda bo‘shatilganini ro‘kach qilgan holda 673 million so‘mlik somon g‘aramini yoqib yuborgan.
Sudlanuvchi Jinoyat kodeksining 173-moddasi (mulkni qasddan nobud qilish yoki unga zarar yetkazish) bilan aybli deb topilib, uch yil muddatga ozodlikdan mahrum etildi.
Izoh (0)