O‘zbekiston hududiga Rossiyadan noqonuniy qurol olib o‘tish bilan bog‘liq holatlarga chek qo‘yildi. Bu haqda Qoraqalpog‘iston Respublikasi Bojxona boshqarmasi xabar berdi.
Qayd etilishicha, “Dovut-ota” chegara bojxona posti xodimlari tomonidan Feya laqabli xizmat iti yordamida Rossiyadan O‘zbekistonga kirib kelgan Cadillac rusumli avtotransport vositasi bojxona ko‘rigidan o‘tkazilgan. Ko‘rik davomida Rossiya fuqarosiga tegishli bo‘lgan, bojxona xodimining og‘zaki so‘rovida aytilmagan va yo‘lovchi bojxona deklaratsiyasida taqdim qilinmagan 1 dona gazli to‘pponcha, 9 dona to‘pponchaning gaz ballonlari, 1050 dona “Vistrel kalibr 4,5 mm” nomli droblar va 2 dona gazli pistolet uchun kaburalarni o‘z ehtiyoji uchun olib kelayotgani aniqlangan.
Xuddi shunday yana bir holatda, “Dovut-ota” chegara bojxona posti orqali Rossiyadan mamlakatga kirib kelgan Ford rusumli avtotransport vositasida O‘zbekistonda faoliyat yuritayotgan MCHJlarning birining nomiga olib kelinayotgan xalqaro kuryerlik jo‘natmalari bojxona ko‘zdan kechiruvidan o‘tkazilgan.
Natijada kuzatuv hujjatlarida va yo‘lovchi bojxona deklaratsiyasida yozib ko‘rsatilmagan, tegishli ruxsatnomalarga ega bo‘lmagan oq rangli polietilen qop ichida avval foydalanilgan 1 dona qora rangli “4,5 mm (VV CAL)” yozuvli pnevmatik pistolet borligi aniqlangan.
Mazkur holatlar yuzasidan bojxona organlari tomonidan tergovga qadar tekshiruv harakatlari olib borilmoqda.
Pnevmatik, signal beruvchi, uloqtirish qurolini, o‘zini o‘zi himoya qilish qurolini ichki ishlar organlarining tegishli ruxsatnomalarisiz realizatsiya qilish, olish, saqlash, olib yurish, tashish, kolleksiyalash, ko‘rgazmaga qo‘yish, ulardan foydalanish, O‘zbekiston hududiga olib kirish yoki O‘zbekiston hududidan olib chiqish, shuningdek, O‘zbekiston hududi orqali tranzit olib o‘tish — qurolni musodara qilib, fuqarolarga bazaviy hisoblash miqdorining 15 baravaridan 30 baravarigacha (9 million so‘m), mansabdor shaxslarga esa — 25 baravaridan 50 baravarigacha (15 million so‘m) miqdorda jarima solishga yoki 15sutkagacha maʼmuriy qamoqqa olishga sabab bo‘ladi.
Izoh (0)