Сирдарё вилоятида ўзи аввал ишлаган корхонадаги сомон ғарамига қасддан ўт қўйган фуқарога ҳукм ўқилди. Бу ҳақда “Замон” информацион дастурида маълум қилинди.
Қайд этилишича, жиноят ишлари бўйича Сардоба туман суди 52 ёшли электр монтёри томонидан содир этилган ишни кўриб чиқди.
Аниқланишича, судланувчи Сардоба туманидаги МЧЖнинг ҳиндистонлик раҳбари билан иш юзасидан тортишиб қолган, ўз навбатида раҳбар уни қайта ишхонага киритмаслик бўйича қоровулларга кўрсатма берган.
Эртаси куни ишхонага келганида бинога киритилмаган эркак шу ҳудуддаги сомон ғарамига ўт қўйиб, ғарам катта оловга айлангач, қочиб кетган.
Судья Зафаржон Расуловнинг айтишича, бу вақтда ишчи маст бўлган. У корхона раҳбариятига қўнғироқ қилиб, ноқонуний равишда бўшатилганини рўкач қилган ҳолда 673 миллион сўмлик сомон ғарамини ёқиб юборган.
Судланувчи Жиноят кодексининг 173-моддаси (мулкни қасддан нобуд қилиш ёки унга зарар етказиш) билан айбли деб топилиб, уч йил муддатга озодликдан маҳрум этилди.
Изоҳ (0)