2022 йилда Хитойнинг бир қатор компаниялари Россияга ҳарбий мақсадларда ишлатилиши мумкин бўлган қурол-аслаҳа, жумладан, автоматлар, дрон қисмлари ва зирҳли нимчаларни жўнатган. Бу ҳақда Politico ImportGenius агрегаторининг божхона маълумотларига таяниб ёзмоқда.
Қуроллар 2022 йилнинг июнидан декабригача етказиб берилган. Таъминотчилар орасида Хитой ҳукуматига алоқадор камида битта компания бор эди — Хитойнинг энг йирик мудофаа пудратчиларидан бири бўлган China North Industries Group Corporation Limited. Июнь ойида у Россиянинг мамлакат Мудофаа вазирлиги билан ҳамкорлик қиладиган “Техкрим” компаниясига мингта CQ-А милтиқларини юборган, деб ёзади нашр.
Яна бир компания — Dа-Jiang Innovations Science & Technology Cо. (DJI) — ноябрь ва декабрь ойларида Бирлашган Араб Амирликлари орқали Россиянинг кичик дистрибюторига дронлар учун эҳтиёт қисмлари — аккумуляторлар ва камералар юборган. Дронлар учун жами 12 партия эҳтиёт қисмлари етказиб берилган.
Бундан ташқари, 2022 йил охирида Туркия орқали Россияга Хитойнинг қиймати қарийб 10 миллион долларлик 800 тоннадан ортиқ ўқ ўтказмайдиган жилетлари олиб кирилган.
Politico маълумотларига кўра, жўнатилган юкларнинг ҳажми ва характери Пекин Москвага ҳарбий ёрдамни мақсадли етказиб бераётганини кўрсатмайди, бироқ бу товарлар ҳарбий ҳаракатларда қўлланилиши мумкин бўлган икки мақсадли маҳсулотлар экани аниқ. Нашр Украинадаги урушда Хитой милтиқлардан фойдаланилганига оид далилларни топа олмади, аммо жанг майдонида Хитой дронларини кўришган.
Февраль ойида АҚШ давлат котиби Энтони Блинкен Хитой Россияга ноҳарбий ёрдам кўрсатаётганини, бироқ қурол етказиб бериш масаласини ҳам кўриб чиқаётганини айтганди. Ўз навбатида, Хитой Украинадаги урушга айнан Америка қурол-яроғлари сабаб бўлаётганини айтиб, АҚШни айблади.
Германиянинг Der Spiegel нашри россиялик ҳарбийлар Хитойнинг дрон ишлаб чиқарувчи компанияси билан камикадзе дронларини етказиб бериш бўйича музокаралар олиб бораётгани ҳақида хабар берди. Нашр маълумотларига кўра, 100 та дроннинг биринчи партияси Россияга 2023 йил апрелида етказилиши мумкин. Урушни ўрганиш бўйича Америка институти экспертлари Хитой Беларусь ёрдамида Ғарб санкцияларини четлаб ўтишга умид қилаётганини хабар қилди.
Изоҳ (0)