Rossiyalik taniqli stendap komik va videobloger Danila Poperechniyning Toshkentdagi chiqishi senzuraga uchradi.
14-mart kuni rossiyalik komik Toshkentda “Quvnoq/hayot” nomli konsert dasturini taqdim etgan. Chiqish davomida uning mikrofoni ko‘p marotaba o‘chib qoldi. Konsertdan keyin u Instagram’da buni tashkilotchilar atay qilgani haqida yozdi.
“Bu post Toshkentda 1500 kishi uchun ajoyib konsert uyushtirganim haqida bo‘lishi mumkin edi. Lekin haqiqat shuki, konsertimdan dunyoda sodir bo‘layotgan voqealar bilan bog‘liq barcha qismlar olib tashlandi. Har gal hazil yoki mavzu hozirgi kun tartibiga hech bo‘lmaganda bilvosita yaqin borsa ham, mikrofonni shunchaki o‘chirib qo‘yaverishdi. Ular hatto konsertning ochilish qismida ‘Rossiya’ so‘zi oddiy ma’noda qatnashgan hazillarni ham hech bir kelishuvsiz, o‘zbilarmonlik bilan kesib tashlashdi”, — deydi komik.
Uning so‘zlariga ko‘ra, “mahalliy huquq-tartibot idoralari talabi bilan konsert dasturining kamida 50 daqiqasi shu yo‘sinda o‘tgan”. “O‘zimni uyga qaytgandek his qildim”, — dedi u.
“Mayli, Toshkent, tugatamiz shekilli. Aftidan aytadigan hazillarim uchun mikrofonim o‘chiriladi. Urushga yo‘q, xayrli tun”, — deya shouni yakunlagan Poperechniy.
Danila Poperechniy tomoshabinlardan pul to‘lab kirgan shoulari ko‘ngildagidek o‘tmagani, uning bir qismigina namoyish etilgani (konsert dasturi 2,5 soatga mo‘ljallangandi) uchun uzr so‘radi. Uning ta’kidlashicha, tomoshabinlar pulini qaytarib olish uchun ariza berishi mumkin.
Izoh (0)