Italiya razvedkasi mamlakat mudofaa vaziri Gido Krozettoga suiqasd uyushtirilishi ehtimolidan xabar topdi. Suiqasd Rossiya tomonidan qo‘llab-quvvatlanayotgan bo‘lishi mumkin, deb xabar berdi Italiyaning Il Foglio nashri.
Nashr yozishicha, suiqasdga Rossiya sobiq prezidenti Dmitriy Medvedev 15 million dollar mukofot evaziga buyurtma bergan.
Italiya razvedkasi Krozettoni “kamdan-kam uchraydigan ahmoq” deb atagan Medvedevning bayonotlaridan xavotirda. Medvedev Krozettoning Kiyevga rus tanklari kirsa, uchinchi jahon urushi boshlanadi, degan gapiga shunday munosabat bildirgandi.
Ta’kidlanishicha, Medvedev hozirda Rossiya Xavfsizlik kengashi kotibi o‘rinbosari sifatida va Rossiya prezidenti Vladimir Putinga yaqin odam bo‘lgani uchun qarorlar qabul qilishda o‘z ta’sir kuchiga ega.
Nashrning yozishicha, Italiya maxsus xizmatlari Rossiya sobiq prezidentining 15 million dollar evaziga Italiya mudofaa vaziriga suiqasd uyushtirish “buyrug‘i”ni tutib olgan. Buyruq “Vagner” xususiy harbiy kompaniyasi jangchilariga yo‘llangan edi.
Izoh (0)