Pokiston sobiq bosh vaziri Imron Xon rasmiylar uni hibsga olishga harakat qilib, qonundan tashqari harakat qilayotganini aytdi. Siyosatchi BBC’ga bu haqda ma’lumot berdi.
Politsiya 14-mart kuni sobiq bosh vazirni hibsga olishga uringanida uning tarafdorlari bilan to‘qnashuv yuz bergan.
“Ularning barchasi mamlakat qonunlariga bo‘ysunishi kerak”, — deya Imron Xon uni hibsga olmoqchi bo‘lganlar haqida gapirgan.
Siyosatch bosh vazir lavozimida bo‘lgan vaqtida davlat sovg‘alarini sotishda ayblangan. U bu ish siyosiy motivlarga ega bo‘lganini qayd etgan.
14-mart kuni Xonning Lahor shahridagi uyi yaqinida politsiya uni hibsga olish uchun kelganida siyosatchining tarafdorlari bilan keskinlik avj olgan. Ofitserlar tosh va g‘isht otayotgan Xonning tarafdorlarini tarqatish uchun ko‘zdan yosh oqizuvchi gazdan foydalangan.
Xonning ta’kidlashicha, politsiya uni 14-mart kuni hibsga olishiga “hech qanday sabab” yo‘q, chunki u 18-martgacha himoya garovi olgan. U hukumat avvalgi muvaffaqiyatsiz urinishdan keyin uni qamoqqa olishga qat’iy qaror qilganini aytgan.
“Men tunni kamerada o‘tkazishga ruhan tayyorman. Qancha kecha o‘tishini bilmayman, lekin bunga tayyorman”, — degan u.
Imron Xon uning partiyasining bo‘lajak saylovlarda ishtirok etishini to‘xtatish uchun rasmiylar uni hibsga olishga urinayotgani da’vo qilgan.
“Men qamoqdamanmi yoki yo‘qmi, ular mening partiyamning g‘alabasini to‘xtata olmaydi”, — deya ta’kidlagan Xon.
Hukumatga ko‘ra, hibsga olish jarayonining saylovlarga aloqasi yo‘q va politsiya uni korrupsiya ishi bo‘yicha hibsga olish to‘g‘risidagi sud qarorlarinigina bajarmoqda. Xon o‘zining partiya xodimlari, ayollar va bolalardan hibsdan qochish va tartibsizliklarni kuchaytirish uchun tirik qalqon sifatida foydalanayotgani aytilmoqda.
Imron Xon 14-mart kuni politsiya va tarafdorlari o‘rtasidagi to‘qnashuvlardan bir necha soat o‘tib, uyi oldida tarafdorlari bilan ko‘rishgan. U olomonga murojaat qilib, Lahor shahridagi qarorgohi yonida yig‘ilganlar bilan suratga tushgan. Siyosatchini hibsga olish amaliyoti hozircha to‘xtatilgan.
Xonni hibsga olish siyosatchining uyiga yaqin joyda kriket turniri o‘tkazilishi uchun to‘xtatilgani, sababi qarama-qarshilik katta tirbandliklarga sabab bo‘lishi aytilgan.
Izoh (0)