AQSH sobiq yetakchisi Donald Trampning bo‘lajak saylovlarda AQSH prezidentligiga Respublikachilar partiyasidan nomzod sifatida ko‘rsatilishi Vashingtonning Kiyevga davomiy yordam ko‘rsatishini qiyinlashtiradi. NATO sobiq bosh kotibi Anders Fog Rasmussen Politico jurnalistlariga bergan intervyusida shunday fikr bildirdi.
“Agar Tramp (AQSH prezidentligiga) nomzod sifatida ko‘rsatilsa, men buni geosiyosiy falokat deb atayman, chunki saylovoldi kompaniyasida uning taʼsiri halokatli bo‘ladi”, — dedi Rasmussen.
Uning fikricha, AQSHda o‘tkazilgan so‘rov natijalari amerikaliklar orasida “Ukrainani qo‘llab-quvvatlash kuchsizlashganidan” dalolat beradi. Agar Tramp Respublikachilar partiyasidan prezidentlikka nomzod bo‘lsa, bu jarayon tezlashadi.
“Uning g‘oyalari Amerika jamiyatining ma’lum qismi uchun jozibadorligining o‘zi Amerika siyosatini noto‘g‘ri yo‘nalishga boshlaydi”, — deydi Rasmussen.
NATO sobiq bosh kotibining so‘zlariga ko‘ra, Tramp AQSHning Ukraina bo‘yicha bunday kursini qo‘llab-quvvatlaydi, bu esa “taslim bo‘lish”ga aylanadi. Rasmussen respublikachilar bo‘lajak prezidentlik saylovlarida “AQSHning jahon siyosatidagi yetakchi roliga Trampdan ko‘ra ko‘proq munosib nomzodni ko‘rsatishiga” umid bildirdi.
Politico materialida qayd etilishicha, Rasmussen “Ukraina hukumatining maslahatchisi” va Kiyev manfaatlari yo‘lida lobbichilik qiladi. U Vashington maʼmuriyati va AQSH qonunchilaridan Ukrainaga harbiy yordam ko‘rsatish hamda unga “uzoq muddatli xavfsizlik kafolatlari” berishni so‘ramoqda.
AQSHda navbatdagi prezidentlik saylovi 2024-yilning noyabr oyiga belgilangan. Tramp 2022-yilning noyabrida davlat rahbari lavozimi uchun kurashga tayyorligini eʼlon qilgandi. AQSHning BMTdagi sobiq elchisi Nikki Xeyli ham Respublikachilar partiyasidan prezidentlikka nomzodini qo‘yishi ma’lum qilindi.
Amerikaning amaldagi rahbari Jo Bayden qayta saylanishga umid qilayotganini bildirgan bo‘lsa-da, hali nomzodini rasman ilgari surgani yo‘q.
Izoh (0)