Moody’s xalqaro reyting agentligi AQSHning butun bank tizimi bo‘yicha o‘z prognozini barqarordan salbiyga tushirdi. Bu haqda agentlik hisobotiga tayanib CNBC xabar bermoqda.
“Biz Silicon Valley Bank (SVB), Silvergate Bank va Signature Bank (SNY) depozitlari chiqib ketishi, shuningdek bankrotlikdan so‘ng tez yomonlashayotgan operatsion muhitni aks ettirish uchun AQSH bank tizimi bo‘yicha prognozlarimizni salbiyga o‘zgartirdik”, — deyiladi xabarda.
Hisobotga ko‘ra, Moody’s investorlar ishonchining pasayishi AQSH banklari aktivlarini boshqarish risklarida ham o‘z aksini topmoqda, deb hisoblaydi.
Ushbu risklar Federal rezerv tizimi (Fed) foiz stavkalarining oshishi bilan kuchayadi. Agentlikning qayd etishicha, bankrot bank mijozlariga tovon puli to‘lash bo‘yicha hukumat va’dalariga qaramay, xavflar saqlanib qolmoqda.
Moody’s AQSH pul-kredit siyosatiga bosim inflyatsiya Fedning maqsadli ko‘rsatkichiga qaytguniga qadar davom etishini kutmoqda.
Agentlik ma’lumotlariga ko‘ra, AQSH banklari COVID-19 pandemiyasi davrida fiskal rag‘batlantirish va past stavkalar sharoitida omonatlarning ortiqcha taklifiga duch kelmoqda.
11-mart kuni Silicon Valley Bank Kaliforniya regulyatori tomonidan bankrot deb e’lon qilindi.
SVB AQSHdagi eng yirik 16-bankdir. SVB bankrotligi 2008-yildagi inqirozdan keyingi eng yirik bankrotlik bo‘ldi. U AQSH tarixidagi Vashington Mutual Bank’dan keyin ikkinchi yirik bankrotga aylandi.
Keyinchalik tizimli xavflar tufayli Signature banki ham yopildi. AQSH prezidenti Jo Bayden bankrot bo‘lgan banklar rahbariyatining ishdan bo‘shatilishi va javobgarlikka tortilishi, bank sektoriga nisbatan nazorat va tartibga solish choralari kuchaytirilishiga va’da berdi.
Izoh (0)