Moody’s халқаро рейтинг агентлиги АҚШнинг бутун банк тизими бўйича ўз прогнозини барқарордан салбийга туширди. Бу ҳақда агентлик ҳисоботига таяниб CNBC хабар бермоқда.
“Биз Silicon Valley Bank (SVB), Silvergate Bank ва Signature Bank (SNY) депозитлари чиқиб кетиши, шунингдек банкротликдан сўнг тез ёмонлашаётган операцион муҳитни акс эттириш учун АҚШ банк тизими бўйича прогнозларимизни салбийга ўзгартирдик”, — дейилади хабарда.
Ҳисоботга кўра, Moody’s инвесторлар ишончининг пасайиши АҚШ банклари активларини бошқариш рискларида ҳам ўз аксини топмоқда, деб ҳисоблайди.
Ушбу рисклар Федерал резерв тизими (Fed) фоиз ставкаларининг ошиши билан кучаяди. Агентликнинг қайд этишича, банкрот банк мижозларига товон пули тўлаш бўйича ҳукумат ваъдаларига қарамай, хавфлар сақланиб қолмоқда.
Moody’s АҚШ пул-кредит сиёсатига босим инфляция Fed’нинг мақсадли кўрсаткичига қайтгунига қадар давом этишини кутмоқда.
Агентлик маълумотларига кўра, АҚШ банклари COVID-19 пандемияси даврида фискал рағбатлантириш ва паст ставкалар шароитида омонатларнинг ортиқча таклифига дуч келмоқда.
11 март куни Silicon Valley Bank Калифорния регулятори томонидан банкрот деб эълон қилинди.
SVB АҚШдаги энг йирик 16-банкдир. SVB банкротлиги 2008 йилдаги инқироздан кейинги энг йирик банкротлик бўлди. У АҚШ тарихидаги Washington Mutual Bank’дан кейин иккинчи йирик банкротга айланди.
Кейинчалик тизимли хавфлар туфайли Signature банки ҳам ёпилди. АҚШ президенти Жо Байден банкрот бўлган банклар раҳбариятининг ишдан бўшатилиши ва жавобгарликка тортилиши, банк секторига нисбатан назорат ва тартибга солиш чоралари кучайтирилишига ваъда берди.
Изоҳ (0)