Amerika banki Silicon Valley Bank (SVB) bankrot bo‘lganidan so‘ng ikki kun ichida jahon moliya sektori 465 milliard dollar yo‘qotdi. Bu haqda Bloomberg xabar berdi.
Unga ko‘ra, mintaqaviy Amerika banklari eng ko‘p zarar ko‘rgan. KBW Mintaqaviy bank indeksi 7,7 foizga tushib ketdi, bu 2020-yil iyunidan beri eng keskin pasayishdir.
Osiyo-Tinch okeani mintaqasining MSCI Asia Pacific kompozit indeksi 3,1 foizga kamaydi. Yaponiyaning Mitsubishi UFJ bank xoldingi aksiyalari kotirovkalari 8,6 foizga, Janubiy Koreyaning Hana Financial Grup kompaniyasi 3,9 foizga, Avstraliyaning ANZ Grup Holdings kompaniyasiniki 1,5 foizga arzonlashdi.
Credit Suisse Group Osiyo-Tinch okeani mintaqasi bo‘yicha bosh direktori Jon Vudsning ta’kidlashicha, moliyaviy bozorlar hozirda “nozik muz ustida harakatlanmoqda”.
Unga ko‘ra, bank sohasidagi notinchliklar tufayli AQSH Federal zaxira tizimi pul-kredit siyosatini ishlab chiqish uchun “tanaffus” oladi.
10-mart kuni Kaliforniya moliyaviy himoya departamenti AQSHdagi 16-yirik bank SVB bankrot bo‘lganini e’lon qildi. Kremniy vodiysi korxonalarining yetakchi kreditorlaridan biri ikki kundan kamroq vaqt ichida bankrot bo‘ldi.
Ta’kidlanishicha, bu 2008-yildagi moliyaviy inqirozdan keyin AQSHdagi eng yirik bank inqirozi bo‘ldi. Bundan so‘ng, Signature bank 12-mart kuni Nyu-York shtatining tegishli organi qarori bilan yopildi.
Izoh (0)