2008-yilda Lehman Brothers’ning qulashini bashorat qilgan amerikalik investor, “Boy ota, kmbag‘al ota” kitobi muallifi Robert Kiyosaki Shveysariyaning Credit Suisse bankining yaqin orada bankrot bo‘lishini kutmoqda. Bu haqda u Fox telekanalining “Kavuto: Sohildan sohilga” tok-shousida aytib o‘tdi.
“Muammo obligatsiyalar bozorida... va menimcha, keyingi bank Credit Suisse bo‘ladi”, — deydi Kiyosaki.
Robert Kiyosakining izohi Amerikaning Silicon Valley Bank (SVB) va Signature Bank banklari bankrot bo‘lishi ortidan yangradi. Bu esa butun dunyo bo‘ylab moliyaviy kompaniyalarning kotirovkalari qulashiga olib keldi. Bir necha kun ichida ular bozor kapitallashuvidan jami 465 milliard dollar yo‘qotdi.
Credit Suisse uzoq vaqtdan beri jiddiy moliyaviy muammolarni boshdan kechirmoqda. Archegos Capital va Greenseel Capital bankrotligi kabi bir qator shov-shuvli janjallar shular jumlasidandir.
O‘tgan yilning iyun oyida Credit Suisse bolgariyalik giyohvand moddalar savdogarlarining pullarini yuvishda aybdor deb topilgan birinchi yirik Shveysariya bankiga aylangandi.
Shveysariya banki 2022-yilni 7,3 milliard frank sof zarar bilan yakunladi, bu global moliyaviy inqiroz boshlangan 2008-yildan beri eng yomon natija.
Yillar davomida Credit Suisse kapitallashuvi 95 foizga tushib ketdi. Bugun bank so‘nggi yillar uchun moliyaviy hisobotlarni tayyorlashda “katta kamchiliklar” aniqlanganini ma’lum qildi.
Bankning moliyaviy hisobotiga oid savollar avvalroq AQSH Qimmatli qog‘ozlar va birjalar komissiyasida paydo bo‘lgandi.
Shu sababli Credit Suisse yillik hisobotni chop etishni kechiktirishga majbur bo‘lgan. Bank so‘nggi yillarda moliyaviy hisobotlar ustidan ichki nazorat samarali bo‘lmaganini tan olgan.
Izoh (0)