2008 йилда Lehman Brothers’нинг қулашини башорат қилган америкалик инвестор, “Бой ота, кмбағал ота” китоби муаллифи Роберт Киёсаки Швейцариянинг Credit Suisse банкининг яқин орада банкрот бўлишини кутмоқда. Бу ҳақда у Fox телеканалининг “Кавуто: Соҳилдан соҳилга” ток-шоусида айтиб ўтди.
“Муаммо облигациялар бозорида... ва менимча, кейинги банк Credit Suisse бўлади”, — дейди Киёсаки.
Роберт Киёсакининг изоҳи Американинг Silicon Valley Bank (SVB) ва Signature Bank банклари банкрот бўлиши ортидан янгради. Бу эса бутун дунё бўйлаб молиявий компанияларнинг котировкалари қулашига олиб келди. Бир неча кун ичида улар бозор капиталлашувидан жами 465 миллиард доллар йўқотди.
Credit Suisse узоқ вақтдан бери жиддий молиявий муаммоларни бошдан кечирмоқда. Archegos Capital ва Greenseel Capital банкротлиги каби бир қатор шов-шувли жанжаллар шулар жумласидандир.
Ўтган йилнинг июнь ойида Credit Suisse болгариялик гиёҳванд моддалар савдогарларининг пулларини ювишда айбдор деб топилган биринчи йирик Швейцария банкига айланганди.
Швейцария банки 2022 йилни 7,3 миллиард франк соф зарар билан якунлади, бу глобал молиявий инқироз бошланган 2008 йилдан бери энг ёмон натижа.
Йиллар давомида Credit Suisse капиталлашуви 95 фоизга тушиб кетди. Бугун банк сўнгги йиллар учун молиявий ҳисоботларни тайёрлашда “катта камчиликлар” аниқланганини маълум қилди.
Банкнинг молиявий ҳисоботига оид саволлар аввалроқ АҚШ Қимматли қоғозлар ва биржалар комиссиясида пайдо бўлганди.
Шу сабабли Credit Suisse йиллик ҳисоботни чоп этишни кечиктиришга мажбур бўлган. Банк сўнгги йилларда молиявий ҳисоботлар устидан ички назорат самарали бўлмаганини тан олган.
Изоҳ (0)