Fitch 2023-yil uchun iqtisodiy o‘sish prognozini oshirdi

Fitch xalqaro reyting agentligi 2023-yilda jahon iqtisodiy o‘sish prognozini oshirdi. Bu haqda “Daryo”ga agentlik hisobotidan ma’lum bo‘ldi.

Bunda ijobiy omillar sifatida Xitoyda Covid-19 cheklovlarining olib tashlanishi, Yevropada gaz inqirozining sezilarli darajada yumshashi, shuningdek, AQSHdagi iste’mol talabining kutilmagan barqarorligi ko‘rsatildi.

Fitch’ning yangi prognoziga ko‘ra, 2023-yilda jahon yalpi ichki mahsuloti dekabr oyida kutilganidek 1,4 foizga emas, 2 foizga oshadi.

Xitoy iqtisodiyotining joriy yildagi o‘sish prognozi 4,1 foizdan 5,2 foizga, Yevrohudud — 0,2 foizdan 0,8 foizga, AQSH — 0,2 foizdan 1 foizga ko‘tarildi.

Shu bilan birga, Fitch 2024-yil uchun global yalpi ichki mahsulot o‘sishi prognozini 2,7 foizdan 2,4 foizga tushirdi.

Bu Federal rezerv tizimi va Yevropa Markaziy banki tomonidan asosiy foiz stavkalarining tez sur’atlarda o‘sishining kechiktirilgan ta’siri bilan bog‘liq, — deyiladi hisobotda.

Agentlik ekspertlariga ko‘ra, ish haqi o‘sishi manbai bo‘lgan mehnat bozoridagi nomutanosibliklar kamaymayapti.

Fitch Fed stavkasining eng yuqori cho‘qqisini 5,5 foiz va ECB kreditlari bo‘yicha bazaviy foiz stavkasi 4 foiz bo‘lishini kutmoqda, stavkalar iyun oyida bu darajaga yetadi.