Fitch халқаро рейтинг агентлиги 2023 йилда жаҳон иқтисодий ўсиш прогнозини оширди. Бу ҳақда “Дарё”га агентлик ҳисоботидан маълум бўлди.
Бунда ижобий омиллар сифатида Хитойда Covid-19 чекловларининг олиб ташланиши, Европада газ инқирозининг сезиларли даражада юмшаши, шунингдек, АҚШдаги истеъмол талабининг кутилмаган барқарорлиги кўрсатилди.
Fitchънинг янги прогнозига кўра, 2023 йилда жаҳон ялпи ички маҳсулоти декабрь ойида кутилганидек 1,4 фоизга эмас, 2 фоизга ошади.
Хитой иқтисодиётининг жорий йилдаги ўсиш прогнози 4,1 фоиздан 5,2 фоизга, Евроҳудуд — 0,2 фоиздан 0,8 фоизга, АҚШ — 0,2 фоиздан 1 фоизга кўтарилди.
Шу билан бирга, Fitch 2024 йил учун глобал ялпи ички маҳсулот ўсиши прогнозини 2,7 фоиздан 2,4 фоизга туширди.
Бу Федерал резерв тизими ва Европа Марказий банки томонидан асосий фоиз ставкаларининг тез суръатларда ўсишининг кечиктирилган таъсири билан боғлиқ, — дейилади ҳисоботда.
Агентлик экспертларига кўра, иш ҳақи ўсиши манбаи бўлган меҳнат бозоридаги номутаносибликлар камаймаяпти.
Fitch Fed ставкасининг энг юқори чўққисини 5,5 фоиз ва ECB кредитлари бўйича базавий фоиз ставкаси 4 фоиз бўлишини кутмоқда, ставкалар июнь ойида бу даражага етади.
Изоҳ (0)