Toshkent shahri Yashnobod tumanidagi 152-maktabda o‘qituvchi o‘quvchilarni kaltaklagani haqida xabar berilgandi. Poytaxt XTBB axborot xizmati holat yuzasidan qo‘shimcha ma’lumot berdi.
Ma’lum bo‘lishicha, holat 2-mart kuni dars jadvali bo‘yicha beshinchi soatda sodir bo‘lgan. Biologiya fani o‘qituvchisi G.M. 8-“A” sinfda dars o‘tayotgan mahalida o‘quvchilar X.D. va O.O.ning telefon o‘ynayotganini ko‘rib, ularni bir necha marotaba ogohlantirgan, tanbeh bergan. Ammo o‘quvchilar o‘qituvchisining tanbehiga ham e’tibor qilmay, darsga xalaqit qilishda davom etishgan. Oqibatda o‘qituvchi G.M. asablarini jilovlay olmagan, o‘quvchilarni tartibga chaqirgan, tanbehini inobatga olmaganligi uchun o‘qituvchi o‘quvchilarni kaltaklagan.
Holat yuzasidan o‘quvchilarning ota-onalari huquq-tartibot idoralariga murojaat qilgan. O‘qituvchi G.M. va o‘quvchining onasiga nisbatan ma’muriy choralar qo‘llanilgan. Hozirda holat yuzasidan maktabdagi ta’lim va tarbiya jarayonlari Xalq ta’limi bosh boshqarmasi tomonidan o‘rganilmoqda.
10-mart kuni Gulchehra Mamajonova (o‘zini shu videodagi o‘qituvchi deb tanishtirgan) ismli profil egasi Telegram’dagi “Domlajon” kanali muhokama guruhida holat yuzasidan munosabatini yozib qoldirdi. Unga ko‘ra, voqea maktab direktori tomonidan uyushtirilgan bo‘lishi mumkin. O‘qituvchi voqea paytida quyushqondan chiqqanini tan olgan, shuningdek, bolaning onasi ham o‘qituvchidan kechirim so‘rab, ayb o‘g‘lida ekanini aytgan.
“Albatta, asl voqeani bilmaymiz, guvoh emasmiz, lekin, menimcha, tuman xalq ta’limi bo‘limi mas’ullari, bu jarayonga hovliqqanlar kesilgan video orqali tayyorlangan reportaj sabab o‘qituvchiga ariza yozdirish bilan ishni yopishni emas, asl voqeani batafsil o‘rganib berishsa, yaxshi bo‘lar edi. Balki o‘qituvchi haqdir, balki o‘quvchi haqdir, lekin nima bo‘lsa ham baribir buni har tomonlama o‘rganish shart”, — deb yozadi Respublika ta’lim markazi direktor o‘rinbosari Isroil Tillaboyev.
Izoh (0)