Тошкент шаҳри Яшнобод туманидаги 152-мактабда ўқитувчи ўқувчиларни калтаклагани ҳақида хабар берилганди. Пойтахт ХТББ ахборот хизмати ҳолат юзасидан қўшимча маълумот берди.
Маълум бўлишича, ҳолат 2 март куни дарс жадвали бўйича бешинчи соатда содир бўлган. Биология фани ўқитувчиси Г.М. 8-“А” синфда дарс ўтаётган маҳалида ўқувчилар Х.Д. ва О.О.нинг телефон ўйнаётганини кўриб, уларни бир неча маротаба огоҳлантирган, танбеҳ берган. Аммо ўқувчилар ўқитувчисининг танбеҳига ҳам эътибор қилмай, дарсга халақит қилишда давом этишган. Оқибатда ўқитувчи Г.М. асабларини жиловлай олмаган, ўқувчиларни тартибга чақирган, танбеҳини инобатга олмаганлиги учун ўқитувчи ўқувчиларни калтаклаган.
Ҳолат юзасидан ўқувчиларнинг ота-оналари ҳуқуқ-тартибот идораларига мурожаат қилган. Ўқитувчи Г.М. ва ўқувчининг онасига нисбатан маъмурий чоралар қўлланилган. Ҳозирда ҳолат юзасидан мактабдаги таълим ва тарбия жараёнлари Халқ таълими бош бошқармаси томонидан ўрганилмоқда.
10 март куни Гулчеҳра Мамажонова (ўзини шу видеодаги ўқитувчи деб таништирган) исмли профил эгаси Telegramъдаги “Домлажон” канали муҳокама гуруҳида ҳолат юзасидан муносабатини ёзиб қолдирди. Унга кўра, воқеа мактаб директори томонидан уюштирилган бўлиши мумкин. Ўқитувчи воқеа пайтида қуюшқондан чиққанини тан олган, шунингдек, боланинг онаси ҳам ўқитувчидан кечирим сўраб, айб ўғлида эканини айтган.
“Албатта, асл воқеани билмаймиз, гувоҳ эмасмиз, лекин, менимча, туман халқ таълими бўлими масъуллари, бу жараёнга ҳовлиққанлар кесилган видео орқали тайёрланган репортаж сабаб ўқитувчига ариза ёздириш билан ишни ёпишни эмас, асл воқеани батафсил ўрганиб беришса, яхши бўлар эди. Балки ўқитувчи ҳақдир, балки ўқувчи ҳақдир, лекин нима бўлса ҳам барибир буни ҳар томонлама ўрганиш шарт”, — деб ёзади Республика таълим маркази директор ўринбосари Исроил Тиллабоев.
Изоҳ (0)