Shavkat Mirziyoyev Si Szinpinni Xitoy raisi lavozimiga qayta saylangani bilan tabrikladi, deb xabar bermoqda prezident matbuot xizmati.
Ma’lum qilinishicha, davlat rahbari Xitoy Xalq Respublikasi raisi Si Szinpinga Butunxitoy xalq vakillari yig‘inining 14-chaqiriq birinchi sessiyasida oliy lavozimga qayta saylangani munosabati bilan tabrik yo‘lladi.
Prezidentning qutlovida so‘nggi yillarda Xitoy Si Szinpin rahbarligida barcha soha va tarmoqlarda misli ko‘rilmagan natijalarga erishgani, ilmiy-texnologik, innovatsion va ijtimoiy rivojlanishda ulkan yutuqlarni qo‘lga kiritgani alohida ta’kidlangan.
Xalqlar o‘rtasidagi ko‘p asrlik do‘stlik rishtalari, siyosiy, savdo-iqtisodiy va madaniy-gumanitar sohalardagi aloqalarni mutlaqo yangi - har tomonlama strategik sheriklik darajasiga ko‘tarishga XXR raisining qo‘shgan ulkan shaxsiy hissasi qayd etilgan. Birgalikdagi sa’y-harakatlar bilan ikki davlatning ko‘p qirrali hamkorligi bundan keyin ham xalqlar manfaatlari yo‘lida jadal rivojlanib borishiga ishonch bildirilgan.
O‘zbekiston prezidenti Si Szinpinga sihat-salomatlik, oilaviy baxt, mas’uliyatli davlatchilik faoliyatida ulkan zafarlar, do‘st Xitoy xalqiga esa tinchlik-osoyishtalik, bardavom ravnaq va farovonlik tilagan.
Ma’lumot uchun, Butunxitoy xalq vakillari kengashi deputatlari 69 yoshli Xitoy raisi Si Szinpinni 5 yilga lavozimiga qayta sayladi. U mamlakat tarixida uchinchi muddatga saylangan ilk yetakchi bo‘ldi.
Izoh (0)