Andijonda noqonuniy mayning ferma tashkil qilgan shaxs aniqlandi

Andijon viloyatida xonadonida noqonuniy mayning ferma tashkil etgan shaxs javobgarlikka tortildi. Bu haqda IIV Kiberxavfsizlik markazi xabar berdi.

Ma’lum qilinishicha, Andijon viloyati IIB Kiberxavfsizlik bo‘limi va DXX Andijon viloyati boshqarmasi xodimlari hamkorligida elektron texnologiyalar bilan bog‘liq noqonuniy holatlarni aniqlash yuzasidan tezkor-profilaktik tadbir o‘tkazilgan. Tadbir davomida Andijon shahrida istiqomat qiluvchi 29 yoshli Q.B. noqonuniy ravishda xonadonida 21 ta faol mayning qurilmalaridan foydalanib, mayning ferma tashkil qilgani aniqlangan.

U mayning ferma faoliyati uchun hech qanday ruxsatnoma va hujjatlarsiz elektr energiyasidan foydalanib kelgan hamda elektr tarmog‘iga o‘zboshimchalik bilan hisoblagichlarsiz ulanib olgan.

Fuqaro Q.B.ga nisbatan Maʼmuriy javobgarlik to‘g‘risidagi kodeksning 101-moddasi (Elektr, issiqlik energiyasi, gazdan foydalanish qoidalarini buzish) bilan 900 million so‘m miqdorida jarima jazosi tayinlangan.