O‘zbekistonda dam olish kunlari havo salqinlab, yomg‘ir yog‘ishi kutilmoqda

O‘zgidromet 11—12-mart kunlari uchun ob-havo prognozini e’lon qildi.

Unga ko‘ra, shanba va yakshanba kunlari O‘zbekiston hududiga Kaspiy dengizi hududlaridan nam va salqin havo massasi kirib kelishi kutilmoqda.

11-mart kuni Buxoro, Navoiy, Qashqadaryo viloyatlarida va kechga tomon Toshkent, Samarqand, Jizzax, Sirdaryo, Surxondaryo viloyatlarida ba’zi joylarda yomg‘ir yog‘adi, momaqaldiroq bo‘lishi mumkin. Respublikaning qolgan hududlarida yog‘ingarchilik kutilmaydi.

12-mart kuni respublika bo‘yicha ba’zi joylarda yomg‘ir yog‘ishi kutilmoqda, ayrim joylarda kuchli bo‘ladi, momaqaldiroq bo‘lishi mumkin. Shimoliy hududlarda yog‘ingarchilik kutilmaydi.

Shanba kuni respublika bo‘yicha ba’zi joylarda shamol tezligi 15-20 metr/sekundgacha kuchayadi, ayrim joylarda chang-to‘zon bilan kuzatiladi. Harorat kechasi 10-15 daraja iliq atrofida, ertaga kunduzi 21-26 daraja iliq bo‘ladi, yakshanba kuni havo salqinroq bo‘ladi, harorat 13-18 daraja iliqdan yuqori bo‘lmaydi.

10-martda respublikaning tog‘li hududlarida qor ko‘chishi xavfi bor. 10—12-martda kutilayotgan yomg‘irlar hisobiga tog‘oldi va tog‘li hududlarda sel-suv toshqin hodisalari yuzaga kelishi mumkin.

Toshkentda shanba kuni kechga tomon va yakshanba kuni kun davomida yomg‘ir yog‘ishi kutilmoqda, momaqaldiroq bo‘lishi mumkin. Sharqiy shamol yo‘nalishini o‘zgartirib, g‘arbdan 7-12 metr/sekund tezlikda esadi.

11-mart kuni kunduzgi havo harorati 24-26 daraja iliqni tashkil etadi, yakshanba kuni 17-19 daraja iliqqacha salqinlashadi.