Шавкат Мирзиёев Си Цзиньпинни Хитой раиси лавозимига қайта сайлангани билан табриклади, деб хабар бермоқда президент матбуот хизмати.
Маълум қилинишича, давлат раҳбари Хитой Халқ Республикаси раиси Си Цзиньпинга Бутунхитой халқ вакиллари йиғинининг 14-чақириқ биринчи сессиясида олий лавозимга қайта сайлангани муносабати билан табрик йўллади.
Президентнинг қутловида сўнгги йилларда Хитой Си Цзиньпин раҳбарлигида барча соҳа ва тармоқларда мисли кўрилмаган натижаларга эришгани, илмий-технологик, инновацион ва ижтимоий ривожланишда улкан ютуқларни қўлга киритгани алоҳида таъкидланган.
Халқлар ўртасидаги кўп асрлик дўстлик ришталари, сиёсий, савдо-иқтисодий ва маданий-гуманитар соҳалардаги алоқаларни мутлақо янги - ҳар томонлама стратегик шериклик даражасига кўтаришга ХХР раисининг қўшган улкан шахсий ҳиссаси қайд этилган. Биргаликдаги саъй-ҳаракатлар билан икки давлатнинг кўп қиррали ҳамкорлиги бундан кейин ҳам халқлар манфаатлари йўлида жадал ривожланиб боришига ишонч билдирилган.
Ўзбекистон президенти Си Цзиньпинга сиҳат-саломатлик, оилавий бахт, масъулиятли давлатчилик фаолиятида улкан зафарлар, дўст Хитой халқига эса тинчлик-осойишталик, бардавом равнақ ва фаровонлик тилаган.
Маълумот учун, Бутунхитой халқ вакиллари кенгаши депутатлари 69 ёшли Хитой раиси Си Цзиньпинни 5 йилга лавозимига қайта сайлади. У мамлакат тарихида учинчи муддатга сайланган илк етакчи бўлди.
Изоҳ (0)