Қашқадарё вилояти Ғузор туманида логистика маркази аукционда сотилмаслиги учун бир кунда 1,4 миллиард сўм кредит қарздорлигини тўлаб берилди. Бу ҳақда МИБ ахборот хизмати “Дарё”га маълум қилди.
Хабарга кўра, Чироқчи туман иқтисодий судининг 2022 йил 25 апрелдаги ижро варақасига асосан қарздор масъулияти чекланган жамият ва қўшимча жавобгар “Б. М.” фермер хўжалиги ҳисобидан 1 миллиард 666 миллион сўмлик муддати ўтган кредит қарздорлигини ундириш белгиланган.
Шунингдек, ундирувни Ғузор туманида жойлашган “Логистика маркази”га қаратиш белгиланган. Ушбу ижро варақа юзасидан Бюронинг Ғузор туман бўлими томонидан ижро иши юритишни қўзғатиш тўғрисида қарор қабул қилиниб, тарафларга маълум қилинган. Аммо қарздор Бюро ходимларининг огоҳлантиришларига қарамасдан қарздорликни бартараф этишмаган.
Шундан сўнг, бўлим давлат ижрочиси ижро ҳужжатинг ижросини таъминлаш мақсадида хатланган Логистика марказини электрон онлайн-аукционларни ташкил этиш маркази орқали “E-ijro auksion” ягона электрон савдо майдончасида сотиш юзасидан қарор қабул қилган.
Ушбу мулк аукцион савдоларида сотилиб кетмаслиги учун қарздор бир кунда 1 миллиард 400 миллион сўм қарздорлигини тўлаб берди.
Аввалроқ Тошкент шаҳар, Яккасарой тумани, Нукус ва Бобур кўчалари кесишувидаги бизнес-марказ кимошди савдосида 42 миллиард сўмга сотилгани ҳақида хабар берилганди. Бино фуқаролик ишлари бўйича суд ҳукми билан Яккасарой туман МИБ бўлими томонидан аукционга қўйилган эди.
Изоҳ (0)