Gruziya parlamenti “xorijiy agentlar” haqidagi qonunni ikkinchi o‘qishda rad etdi, deb xabar bermoqda “Rustavi-2” telekanali. Telekanal xabariga ko‘ra, qonun loyihasiga 35 nafar deputat qarshi, bir kishi esa yoqlab ovoz bergan. Ovoz berishda 112 deputat qatnashgan, ularning aksariyati betaraf qolgan.
9-mart kuni hukmron “Gruziya orzusi” partiyasi va parlamentda ko‘pchilik o‘ringa ega boshqa partiyalar “xorijiy agentlar” haqidagi ikkita qonun loyihasini parlamentdan qaytarib olgandi. Shunga qaramay qonunchilikdan kelib chiqib, deputatlar qonun loyihasiga ikkinchi o‘qishda ovoz berishi shart edi.
7-mart kuni Gruziya parlamenti “Xorijiy taʼsirning shaffofligi to‘g‘risida”gi qonun loyihasini birinchi o‘qishda maʼqullagan. Hujjat uchun 76 deputat ovoz berdi. Loyihada Gruziyada “xorijiy agentlar” reyestrini yaratish ko‘zda tutilgan bo‘lib, unda 20 foizdan ortiq qismi chet eldan moliyalashtiriladigan barcha notijoriy yuridik shaxslar va ommaviy axborot vositalari ro‘yxati keltiriladi. Parlament yig‘ilishi ommaviy noroziliklar fonida bo‘lib o‘tdi.
Qonun loyihasi tasdiqlanganidan so‘ng parlament binosi yaqinidagi namoyishlar politsiya bilan to‘qnashuvlarga aylanib ketdi. Unda politsiya ishtirokchilarga qarshi suv purkagichlar va ko‘zni yoshlatuvchi gaz ishlatgan. Mitinglar yakunida Gruziya Ichki ishlar vazirligi 133 kishining mayda bezorilik va politsiyaga bo‘ysunmaslik bo‘yicha ma’muriy moddalar bo‘yicha hibsga olingani haqida xabar berdi. Yana bir namoyishchi politsiyachiga hujum qilganlikda ayblanib, hibsga olingan. U yetti yilgacha qamoq jazosiga hukm qilinishi mumkin. 9-mart kuni qo‘lga olinganlarning aksariyati qo‘yib yuborilgani ma’lum bo‘ldi.
Izoh (0)