Ukraina Qurolli kuchlari AQSH va Germaniya va’da qilgan ikkita Patriot havo hujumidan mudofaa tizimlarining birinchisini oldi, deb yozmoqda The Financial Times. Nashr ma’lumotlariga ko‘ra, qabul qilingan kompleksdan foydalanish hali boshlanmagan.
Nashrning aniqlik kiritishicha, Ukraina Niderlandiyadan ham bir nechta Patriot raketa tizimlari yetkazib berilishini kutmoqda.
Patriot Ukrainaga keltirilgani haqida avval Polsha mudofaa vaziri Mariush Blashak ma’lum qilgandi, biroq keyinroq Polsha Mudofaa vazirligi Blashakning so‘zlari noto‘g‘ri talqin qilingani haqida bayonot berdi. Vazirlikning tushuntirishicha, Blashak Polshaning sa’y-harakatlari tufayli komplekslarni Ukrainaga yetkazib berishga qaror qilinganini nazarda tutgan.
2022-yilning kuzidan beri Rossiya muntazam ravishda Ukrainaning energetika infratuzilmasi obyektlariga keng ko‘lamli zarbalar bermoqda. Shu munosabat bilan Ukraina rasmiylari Ukrainani havo hujumidan mudofaa tizimlari bilan ta’minlash zarurligini bir necha bor ta’kidlagan.
2023-yil fevralida Fransiya va Italiya SAMP-T-Mamba o‘rta masofaga mo‘ljallangan zenit-raketa komplekslarini Kiyevga topshirishga va’da berdi. Oktabr oyida Germaniya Ukrainaga to‘rtta Iris-T SLM havo mudofaa tizimidan birinchisini topshirgandi. Sentabr oyi oxirida Ukraina AQSHdan NASAMS havo mudofaa tizimlarini olgan.
Izoh (0)