Грузия парламенти “хорижий агентлар” ҳақидаги қонунни иккинчи ўқишда рад этди, деб хабар бермоқда “Рустави-2” телеканали. Телеканал хабарига кўра, қонун лойиҳасига 35 нафар депутат қарши, бир киши эса ёқлаб овоз берган. Овоз беришда 112 депутат қатнашган, уларнинг аксарияти бетараф қолган.
9 март куни ҳукмрон “Грузия орзуси” партияси ва парламентда кўпчилик ўринга эга бошқа партиялар “хорижий агентлар” ҳақидаги иккита қонун лойиҳасини парламентдан қайтариб олганди. Шунга қарамай қонунчиликдан келиб чиқиб, депутатлар қонун лойиҳасига иккинчи ўқишда овоз бериши шарт эди.
7 март куни Грузия парламенти “Хорижий таъсирнинг шаффофлиги тўғрисида”ги қонун лойиҳасини биринчи ўқишда маъқуллаган. Ҳужжат учун 76 депутат овоз берди. Лойиҳада Грузияда “хорижий агентлар” реестрини яратиш кўзда тутилган бўлиб, унда 20 фоиздан ортиқ қисми чет элдан молиялаштириладиган барча нотижорий юридик шахслар ва оммавий ахборот воситалари рўйхати келтирилади. Парламент йиғилиши оммавий норозиликлар фонида бўлиб ўтди.
Қонун лойиҳаси тасдиқланганидан сўнг парламент биноси яқинидаги намойишлар полиция билан тўқнашувларга айланиб кетди. Унда полиция иштирокчиларга қарши сув пуркагичлар ва кўзни ёшлатувчи газ ишлатган. Митинглар якунида Грузия Ички ишлар вазирлиги 133 кишининг майда безорилик ва полицияга бўйсунмаслик бўйича маъмурий моддалар бўйича ҳибсга олингани ҳақида хабар берди. Яна бир намойишчи полициячига ҳужум қилганликда айбланиб, ҳибсга олинган. У етти йилгача қамоқ жазосига ҳукм қилиниши мумкин. 9 март куни қўлга олинганларнинг аксарияти қўйиб юборилгани маълум бўлди.
Изоҳ (0)