Axalteke otlari zoti yo‘qolib ketish xavfi ostida ekani ma’lum qilindi

Amerikaning Livestock Conservancy (Chorvachilikni muhofaza qilish) nodavlat tashkiloti axalteke zotidagi otlarni yo‘qolib ketish xavfi ostidagi nasllar ro‘yxatiga kiritdi.

Ushbu ro‘yxatdagi maqom genetik o‘ziga xos populyatsiyalarni hisoblab chiqish orqali belgilanadi.

“Axalteke otlari Turkmanistonning poyga otlaridan kelib chiqqan bo‘lib, ularga birinchi marta 3000 yil oldin ta’rif berilgan”.

Hisobotda aytilishicha, axalteke zoti dunyo miqyosida kam uchraydi, ularning soni 7000 taga yetmaydi.

Livestock Conservancy tashkilotining ta’kidlashicha, axaltekelar arab otlari zoti paydo bo‘lishidan oldin mavjud bo‘lgan. Tarixan turkman zotlari Yevropadagi ot zotlari, eng avvalo, ingliz chavandozlari mingan zotlarning rivojlanishiga katta ta’sir ko‘rsatgan.

Eslatib o‘tamiz, Ashxobodda Axalteke otlari xalqaro assotsiatsiyasi shtab-kvartirasi tashkil etilgan, shuningdek, otlarni Butunjahon merosi ro‘yxatiga kiritish uchun UNESCO’ga murojaat qilingan.

Turkmaniston har yili turkman otlari festivalini nishonlaydi, bu eng chiroyli axalteke otlari xalqaro tanlovi kuniga to‘g‘ri keladi.

Eziz Boyarov, Ashxobod