Afg‘onistonning Balx viloyati gubernatori Muhammad Dovud Muzammil 9-mart kuni ertalab sodir bo‘lgan portlashda halok bo‘ldi. Bu haqda TOLOnews telekanali “Tolibon” harakatining Balxdagi kuch tuzilmalariga tayanib xabar berdi.
Ta’kidlanishicha, Muzammil Mozori Sharif shahrida joylashgan viloyat ma’muriyati binosidagi portlash oqibatida halok bo‘lgan. Portlash binoning ikkinchi qavatida granatali jilet kiygan xudkush terrorchi tomonidan sodir etilgan. Gubernatordan tashqari yana ikki kishi halok bo‘lgan.
Bu hodisa “Tolibon” 2021-yil avgustida hokimiyatni egallaganidan keyin tayinlagan eng yuqori martabali amaldorlar orasida birinchi o‘lim bo‘ldi.
Terakt uchun javobgarlikni ISHIDning Afg‘onistonda faoliyat yuritayotgan jangarilari o‘z zimmasiga oldi.
Eslatib o‘tamiz, Balx O‘zbekiston bilan chegaradosh bo‘lib, aynan shu viloyat orqali O‘zbekistondan Afg‘onistonga turli mahsulotlar va insonparvarlik yordamlari, jumladan, xalqaro yuklar olib kelinadi. Bundan tashqari, Termiz shahri Mozori Sharif bilan temiryo‘l orqali bog‘langan. Shaharga O‘zbekistonning turli delegatsiyalari muntazam tashrif buyuradi.
2022-yilning 5-iyul kuni Termiz shahridagi “Majnuntol” mahallasiga Balx viloyatidan otilgan beshta snaryad tushgandi. Oqibatda to‘rtta xususiy uyga kichik zarar yetgan. Keyinchalik maʼlum bo‘lishicha, snaryadlarni ISHIDning Afg‘onistondagi bo‘limi jangarilari otgan, ular ushlangan.
Izoh (0)