Amerikalik milliarder Ilon Mask Texas shtatining Ostin shahri yaqinidagi yangi sotib olingan yaylovlarda o‘z shahrini qurishni rejalashtirmoqda. Bu haqda The Wall Street Journal (WSJ) manbalarga tayanib xabar berdi.
Yer egalari va ko‘chmas mulk agentlari bilan uchrashuvlarda Mask va uning xodimlari shahar kelajagi haqidagi tasavvurlarini Kolorado daryosi bo‘yidagi Texas utopiyasi sifatida tasvirlab berishgan va u yerda Mask kompaniyasi xodimlari yashashi mumkinligini qayd etishgan. Nashr suhbatdoshlarining aytishicha, rejadagi shahar Maskning SpaceX va Boring (infratuzilma va tunnellar qurish bilan shug‘ullanadi) kompaniyalarining Texasda qurilayotgan binolariga tutash joylashadi.
Shahar qurilishi rejalashtirilayotgan joyda allaqachon ochiq sport maydonchasi, suzish havzasi, modulli uylar guruhi va sport zali mavjud. Hududga kiraverishda “Texas shtatining Sneylbrouk shahriga xush kelibsiz” (welcome, snailbrook, tx, est. 2021) degan yozuv osilgan. WSJ’ning aniqlik kiritishicha, Sneylbruk — Maskning buyrug‘iga ishora bo‘lib, u shaharni qurishni boshlaganida unga “shilliqurtdan tezroq” (ingliz tilida snail — shilliqurt) harakatlanuvchi burg‘ulash mashinalari kerakligini aytgandi.
Texas qonuniga ko‘ra, shahar ma’muriy birlik sifatida qo‘shilishga ariza berishdan oldin kamida 201 nafar aholiga ega bo‘lishi, so‘ng okrug sudyasidan ruxsat olishi zarur. Hozirgacha Bastrop okrugiga Maskdan yoki uning tashkilotlaridan hech qanday ariza kelib tushmagan.
Maskning Texasda o‘z shahrini qurish rejalari 2021-yilda e’lon qilingandi. O‘shanda u shahar Starbeys deb atalishini aytgan. Bloomberg’ning yozishicha, gap SpaceX kosmodromi joylashgan Boka Chika qishlog‘i nomini o‘zgartirish haqida ketayotgan edi. Keyinchalik Mask qurilajak shaharning maydoni Boka Chikadan ancha katta bo‘lishini ma’lum qildi.
Izoh (0)