Самарқанд вилояти Жомбой туманида фуқароларни қўрқитиб, яланғоч ҳолда суратга олган ва шу орқали улардан пул талаб қилган аёл қўлга олинди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, 22 ёшли йигит Самарқанд вилояти ИИБга ариза билан мурожаат қилган. Унда Жомбой туманида яшовчи 25-30 ёшлардаги аёл фуқароларнинг ишончига кириш орқали шаҳвоний уйдирмалар уюштириб, фуқароларни қўрқитиш орқали яланғоч ҳолатда тасвирларга туширган ва улардан товламачилик йўли билан пул талаб қилаётганини билдирган. Шунингдек, аёл 2-3 нафар спортчи йигитдан иборат жиноий гуруҳ тузганини ҳам таъкидлаган.
Мазкур гуруҳ ушбу йигитга шантаж қилиб, ундан ёзган “Тилхати”, ҳайдовчилик гувоҳномаси ва машинаси техпаспортини қайтариб олиши эвазига 1500 доллар миқдорида пул сўраган. Йигит аризасида уларга нисбатан чора кўрилишини илтимос қилган.
Аризага асосан вилоят ИИБ Тезкор қидирув хизмати Жиноят қидирув бошқармаси Уюшган жиноятчиликка қарши курашиш бўлими ходимлари томонидан тезкор тадбир ўтказилди. Тадбирда аёл ҳамда унинг шериклари ушбу йигитдан 1500 доллари эвазига унинг қарздорлик “Тилхати”, ҳайдовчилик гувоҳномаси ва техпаспортини қайтариб бераётган вақтда далилий ашёлар билан ушланиб, тегишли тартибда ҳужжатлаштириб олинди.
Аёлнинг жиноий шериклари спортнинг “Миллий кураш”, “Қўл жанги”, “Бокс”, “Муай-тай” ва бошқа турлари билан шуғулланган спортчилар бўлиб, улар бундан ташқари жуда кўп жиноят ва ҳуқуқбузарликлар ҳам содир этгани аниқланди. Улар бир нечта жиноий қилмишларни ташкил этувчи ҳамда зўравонликни тарғиб қилувчи ҳолатларни, жумладан, туҳмат қилиш, ўзгалар мулкини талон-тарож қилиш, товламачилик, талончилик ҳамда ҳужжатларни эгаллаш каби қатор жиноятларни содир этган.
Мазкур шахсларга нисбатан Жиноят кодексининг бир неча моддалари билан жиноят иши қўзғатилиб, ҳозирда тергов ҳаракатлари олиб борилмоқда.
Изоҳ (0)