Farg‘onada muqaddam sudlanib, 18 yil qamoq jazosini o‘tab chiqqan shaxs vayronkor g‘oyalarga yo‘g‘rilgan nashidalarni tinglab, tarqatib kelgani uchun yana sudlandi. Bu haqda “Bu kun” informatsion dasturida ma’lum qilindi.
Qayd etilishicha, sudlanuvchi 1999-yili jinoyat ishlari bo‘yicha Farg‘ona viloyati sudi tomonidan Jinoyat kodeksining 159 (O‘zbekiston Respublikasining konstitutsiyaviy tuzumiga tajovuz qilish) va 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) bilan aybli deb topilib, 18 yilga ozodlikdan mahrum etilgan. Ushbu erkak belgilangan jazoni to‘liq o‘tab chiqqan bo‘lsada, o‘ziga tegishli xulosa chiqarmagan.
Marg‘ilon shahar IIB xodimlari tomonidan fuqaro O‘.ga tegishli bo‘lgan uyali telefon apparati xolislar ishtirokida ko‘zdan kechirilgan. Tekshiruv davomida unda O‘zbekiston hududiga olib kirish, tayyorlash va tarqatish taqiqlangan 10 dan ortiq diniy mazmundagi materiallar saqlanayotgani aniqlangan. U aqidaparastlikka oid materiallarni ijtimoiy tarmoqlardagi shaxsiy profiliga joylash orqali 460 dan ortiq virtual obunachiga ta’sir ko‘rsatishga uringan.
Ayblanuvchi Jinoyat kodeksining 244-1-moddasi bilan aybli deb topilib, 6 yil muddatga ozodlikdan mahrum etildi.
Avvalroq Toshkentda tanishiga nashida yuborgani uchun qamalgan talaba yigit ozod qilingani to‘g‘risida xabar berilgandi.
Izoh (0)