Soliq mobil ilovasi orqali 2 099 554 nafar foydalanuvchiga jami 890,1 mlrd so‘m keshbek tasdiqlab berildi. Bu haqda Soliq qo‘mitasi axborot xizmati xabar berdi.
Xabarga ko‘ra, keshbeklarni to‘plash va uni olishda firibgarlik holatlari yoki shubhali xaridorlar ko‘p uchramoqda. 20 mingdan ortiq foydalanuvchi shubhali xaridorlar ro‘yxatiga tushgan.
Face ID’dan o‘tish talabi bosqichma-bosqich kiritildi. Buning uchun ko‘p narsa talab etilmaydi, faqat 2 ta amal bajariladi (aksariyat 30 sekundgacha vaqt oldi):
- jismoniy shaxsning shaxsiy identifikatsiya raqamini (JSHSHIR) kiritish;
- yuzni to‘liq suratga olib tasdiqlashga yuborish.
Qayd etilishicha, murojaatlar 24/7 rejimda 1198 Call-markaz orqali qabul qilinadi. Isteʼmolchilar va haqiqiy foydalanuvchilarning keshbek olishi kafolatlanadi.
Avvalroq “Soliq” ilovasida ro‘yxatdan o‘tkazilgan cheklar uchun keshbek olishda Face ID bo‘yicha identifikatsiya qilish talabi joriy etilgani haqida xabar berilgan. Shu paytga qadar 500 ming so‘mdan ortiq mablag‘ni hisobga o‘tkazish uchun faqat fotosurat yordamida shaxsni tasdiqlash talab qilinardi. Endi bu shart har qanday bonus miqdori uchun amal qiladi.
Ma’lumot uchun, yanvar oyida cheklari eng ko‘p ro‘yxatdan o‘tkazilgan kompaniyalar orasida Korzinka yetakchilik qilmoqda — 2,6 million dona chek. Korzinka’dan sotib olingan mahsulotlarga 3,7 mlrd so‘m keshbek berilgan.
Ikkinchi o‘rinda Havas cheklari (1,3 million dona, keshbek summasi 703,1 mln so‘m) qayd etilgan bo‘lsa, UNG Petro cheklari (594,5 ming ta chek, keshbek summasi 2,7 mlrd so‘m) uchinchi bo‘lgan.
Izoh (0)