O‘zbekiston va Isroil farmatsevtika va boshqa bir qancha sohalarda hamkorlikni kengaytiradi. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, investitsiyalar, sanoat va savdo vazirining o‘rinbosari Oybek Hamrayev Isroil Davlatining O‘zbekiston Respublikasidagi Favqulodda va muxtor elchisi Zehavit Ben-Hillel bilan uchrashdi. Uchrashuvda 2022-yilda mamlakatlar o‘rtasidagi tovar ayirboshlash hajmi o‘tgan yilga nisbatan ikki barobarga oshgani taʼkidlandi. Tomonlar qo‘shma ishchi guruh tuzish va o‘zaro savdo ko‘rsatkichlarini oshirish bo‘yicha zarur saʼy-harakatlarni amalga oshirishga kelishib oldi.
Tomonlar qo‘shma loyihalarni hayotga joriy qilish bo‘yicha muvaffaqiyatli tajribani inobatga olib, farmatsevtika, kimyo, elektrotexnika, to‘qimachilik, qishloq xo‘jaligi va oziq-ovqat sanoati, energetika, bank, moliya, qurilish, turizm, shuningdek, sog‘liqni saqlash va suv xo‘jaligi sohalarida hamkorlikni kengaytirishdan manfaatdor ekanligini bildirdi.
Uchrashuv yakunlari bo‘yicha Investitsiyalar, sanoat va savdo vazirligi hamda Isroil TIV huzuridagi Xalqaro hamkorlik agentligi o‘rtasida imzolangan anglashuv memorandumida belgilangan vazifalarni amalga oshirishni jadallashtirish bo‘yicha kelishuvga erishildi. Bu ikki davlat o‘rtasidagi ikki tomonlama moliyaviy va texnik hamkorlikni mustahkamlashga yordam beradi.
Maʼlumot uchun, 2018-yildan buyon Isroil kapitali ishtirokidagi korxonalar soni 3,5 barobar oshdi. Samarqand viloyatida tayyor trikotaj mahsulotlari, Toshkent viloyatida omborxona, arxiv, chakana savdo rastalari va tibbiy asbob-uskunalar ishlab chiqarish korxonalarini muvaffaqiyatli amalga oshirilgan loyihalar qatorida sanash mumkin.
Izoh (0)