Polsha kompaniyasi O‘zbekistonning fazo sohasidagi salohiyati yuksalishi yo‘lida o‘zaro hamkorlikka tayyor, deb xabar bermoqda “Dunyo” AA.
Ma’lum qilinishicha, O‘zbekiston elchisi Bahrom Boboyev Polshaning Creotech Instruments SA kompaniyasi bosh direktori o‘rinbosari Yashek Kozyek bilan uchrashdi. U o‘z kompaniyasi “O‘zbekkosmos” – Kosmik tadqiqotlar va texnologiyalar agentligi bilan amaliy hamkorlikni yo‘lga qo‘yishdan manfaatdor ekanini maʼlum qildi.
Creotech Instruments SA — Polshaning yetakchi sunʼiy yo‘ldosh tizimlari va komponentlari ishlab chiqaruvchisi, kvant kompyuterlarini boshqarish tizimlari uchun ilg‘or elektronika yetkazib beruvchisi, shuningdek, uchuvchisiz uchish apparatlarini boshqarish tizimlari uchun qurilmalar va dasturiy taʼminot yetkazib beruvchisi hisoblanadi.
Suhbatdosh kompaniyaning Polshadagi va umuman Yevropadagi faoliyati haqidagi atroflicha maʼlumotlarni o‘rtoqlashdi. 2022-yilda kompaniya Yevropa kosmik agentligi tomonidan “Yuqori tezlikda kvant kalitlarini tarqatish detektori” texnologiyalarining yetkazib beruvchisi sifatida tanlangan. Creotech Instruments SA, shuningdek, ilmiy asboblarni ham yetkazib beruvchi sanaladi.
Yashek Kozyek maxsus funksiyali mikrosatellitlar, texnologiyalar hamda O‘zbekistonning kosmik sohadagi salohiyatini oshirish uchun sunʼiy yo‘ldoshlar yoki uchuvchisiz uchish apparatlari va tegishli texnologiyalar maʼlumotlarini tahlil qilish bo‘yicha zarur o‘quvlarni tashkil etish yuzasidan hamkorlikka tayyorligini aytdi.
Izoh (0)