АҚШда 30 йилдан ортиқ вақт давомида бедарак йўқолган ва ҳатто расман ўлик деб топилган пенсилваниялик аёл Пуэрто-Рикода тирик ҳолда топилди. Бу ҳақда The New York Times хабар берди.
Сирли ғойиб бўлиш ҳоллари кўпинча бедарак йўқолганларнинг тирик топилишига олиб келмайди. Аммо 83 ёшли Патрисия Копта бундан мустасно эди. Ҳозир у бедарак йўқолган жойдан 2700 километр узоқликдаги қариялар уйида деменсия (бош миянинг зарарланиши оқибатида юзага келади ва ақлий қобилият сезиларли даражада пасаяди) касаллигидан даволанмоқда. У қариялар уйи ходимларига ўзининг ҳаёти ҳақида айтиб берган, шундан сўнг улар терговчилар билан боғланиб, 1992 йилда йўқолган аёл, эҳтимол қариялар уйидаги Патрисия Копта эканини билдирган.
Коптанинг синглиси Глория Смит полиция ДНК далиллари орқали унинг опаси ҳақиқатан ҳам Пуэрто-Рикода эканини аниқлаганида, ўзини қандай ҳис қилгани ҳақида айтган. “Шокда эдим. Мен бунга ишонмадим”, — деди у.
Бедарак йўқолган аёлнинг эри Боб Копта у билан 20 йил ҳаёт кечирган. У ҳам рафиқаси тириклигига ишончсизлик билдирган. “Ўттиз бир йил ва бу жуда ёмон ҳолат эди”, — деди у.
Коптанинг оиласи ва полицияга кўра, у 52 ёшида ғойиб бўлгунга қадар руҳий саломатлик билан боғлиқ муаммоларга дуч келган.
“У оила аъзоларига кетаётгани, шаҳардаги қариялар муассасасига жойлаштирилишидан хавотирда экани ҳақида айтган”, — деди Росс шаҳар полиция бошқармаси бошлиғи Брайан Колхеп.
1999 йилда, у бедарак йўқолганидан етти йил ўтиб, қариялар уйи ходимлари Копта хонимни Пуэрто-Рико кўчаларида кезиб юрганида аниқлаган.
“У шахсий ҳаёти ёки келиб чиқишини қариялар уйи ходимлари билан муҳокама қилишдан бош тортган”, — деди полиция.
Ўшанда аёлнинг эри ва қариндошлари унинг ўлган бўлиши мумкинлигига ишонган.
“Бу барчамиз учун қийин эди, чунки онам, синглим ва мен, доимо у ҳақида қайғурардик”, — дейди Коптанинг синглиси
Қариялар уйи ходимлари Коптанинг ДНК суртмасини олиб, терговчиларга юборган. Кейин Смит хоним ва Копта хонимнинг жиянидан ДНК намуналари олинган. Намуналар лабораторияга юборилган, у ерда оилавий тест Пуэрто-Рикодаги аёл ҳақиқатан ҳам Копта хоним деган хулосага келган. Натижалар қайтиб келмасидан олдин ҳам, терговчилар бир неча ой давомида Пуэрто-Рикодаги фотосуратдаги кекса аёл Копта хоним эканига ишонган, унинг 90 йиллардаги узун жигарранг сочлари энди қирқилган ва оқариб кетган.
Смит хоним яқинда Пуэрто-Рикодаги опаси билан кўришини айтди. Жаноб Копта ҳам хотинига нима бўлганини билишдан мамнун эканини билдирди.
“30 йилдан кейин бу ҳақда унутишга ҳаракат қиласиз. Энди мен буни унутишим мумкин. Биз нима бўлганини биламиз ва ҳозир унга ғамхўрлик қилинмоқда”, — дейди у.
Изоҳ (0)