Toshkent viloyati IIBB ijtimoiy tarmoq faoli Emine-Lemara Mirzaahmedovaning hibsga olinishi yuzasidan ma’lumot berdi.
Ma’lum qilinishicha, 47 yoshli Lemara Mirzaahmedovaga tegishli Tex Kredo MCHJga Yangiyo‘l tumani hududida joylashgan xotira maydonchasini zamonaviy shaharsozlik talablari darajasida taʼmirlash uchun shartnoma asosida mahalliy budjet hisobidan 329,3 million so‘m miqdordagi pul mablag‘lari ajratib berilgan.
Keyinchalik, mazkur shartnoma ijrosi yuzasidan o‘tkazilgan auditorlik tekshiruvida esa pudratchi MCHJ rahbari, Lemara Mirzaahmedova va boshqalar tomonidan aslida bajarilmagan 227 million 135 ming so‘mlik ishlarni qo‘shib yozish orqali, rasman bajarilgan ishlar hisobiga kiritib, ko‘p miqdorda budjet mablag‘larini talon-taroj qilganliklari aniqlangan.
Boshqa bir holatda ham ushbu MCHJ mansabdorlari tomonidan xalq taʼlimi bo‘limi tasarrufidagi 7-sonli maktabning qo‘shimcha xo‘jalik binosini qurib berish uchun shartnoma asosida 157 million so‘m budjet mablag‘lari ajratilgan bo‘lib, ish hajmini qo‘shib yozish orqali haqiqatda bajarilmagan ishlar uchun yana 13 million 441 ming so‘m pullar talon-toroj qilingan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 3-chi qismi, 228-moddasi (hujjatlar, shtamplar, muhrlar, blankalar tayyorlash va qalbakilashtirish, sotish yoki foydalanish), 2 va 3-qismi bilan jinoyat ishi qo‘zg‘atilgan.
Hozirda, pudratchi L.Mirzaahmedova himoyachi bilan taʼminlangan holda, jinoyat ishiga jalb etilib, tergov harakatlari olib borilmoqda.
“Shuni alohida qayt etish joizki, mazkur jarayonlar fuqaro L.M.ning OAVdagi blogerlik faoliyatiga aloqador emas”, — deyiladi munosabatda.
Izoh (0)