Jinoyat ishlari bo‘yicha Yangihayot tuman sudida ikki kishini pichoqlashda ayblangan yigitga hukm o‘qildi. Bu haqda “Milliy” telekanalining “Millar” dasturida ma’lum qilindi.
Ma’lum qilinishicha, 2022-yil sentabr oyida Yakkasaroy tumanidagi mehmonxonaga dam olish uchun borgan yigit va qiz o‘rtasida kelishmovchilik yuz bergan. Janjal oqibatida 25 yoshli sudlanuvchi 18 yoshli qizning oyog‘ida pichoq bilan tan jarohat yetkazgan. Bundan tashqari, sudlanuvchi 2-sentabr kuni ayni paytda qidiruvda ekani aytilayotgan 37 yoshli erkak bilan janjallashib qolgan va unga ham pichoq bilan tan jarohat yetkazgan.
Shifokorlar tomonidan ko‘rsatilgan tezkor yordamlar natijasida qiz va erkakning hayoti saqlab qolingan.
Sud majlisida keltirilgan ma’lumotlarga ko‘ra, jabrlanuvchi qiz va pichoqlangan erkak bir-biri bilan tanish bo‘lgan. Sudlanuvchi esa qizni ushbu erkakdan rashk qilib, uni pichoqlagan.
Sudlanuvchi ko‘rsatmasida keltirilishicha, u jabrlanuvchi erkakni urganidan so‘ng, fuqaro yonida bo‘lgan pnevmatik pistoletdan yigitga o‘q uzgan. Hozirda ushbu erkakka nisbatan qidiruv e’lon qilingan.
Jinoyat ishlari bo‘yicha Yangihayot tuman sudida ko‘rib chiqilgan ish davomida sudlanuvchi yigit sud qizni pichoqlagani bo‘yicha aybini tan olmagan.
“Qiz yaqin do‘stim, uni uydagilari haydab yuborgani sabab mehmonxonaga joylab ketmoqchi edim. ‘Zaryadnik’ni pastdan olib chiqqunimcha u hammomga kirib ketibdi. Eshikni och desam, ‘hozir-hozir’ dedi. Shubhalanib, eshikni ochtirsam, qon bo‘lib yotibdi. Jarohat stakanni ustiga yiqilib tushgani sabab yuz bergan. Qo‘lim bilan shisha sinig‘ini oldim. Ekspertiza kesilgan deb xulosa berdi, pichoqlamaganman, lekin birinchi yordam ko‘rsatib, uni shifoxonaga olib bordim”, — deydi sudlanuvchi.
Pichoqlangan erkak bilan esa u restoranda tanishib qolgani, “orqasidan gap tarqatib yurgani”, onasidan so‘kkani uchun janjallashganini aytgan.
Sudlanuvchi Jinoyat kodeksining 109 (qasddan badanga yengil shikast yetkazish) va 277-moddalarida (bezorilik) nazarda tutilgan jinoyatlarni sodir etganlikda aybli deb topilgan. Sud hukmiga ko‘ra u 2 yil 6 oy muddatga ozodlikdan mahrum etildi.
Izoh (0)